Tags-Hawa

kis qadar taskīn ranjūr-e-mohabbat ko huī
pyaar se dekhā jo us ne zaḳhm ko marham huā

jab uThāyā yaar ne rū-e-munavvar se naqāb
gir paḌā ġhash khā ke koī aur koī be-dam huā

gulshan-e-hastī meñ insāñ kī nahīñ kuchh zindagī
jo huā paidā misāl-e-qatra-e-shabnam huā

gesu-e-pur-ḳham hue un ke pareshāñ sog meñ
mere marne se dayār-e-husn meñ mātam huā

baad marne ke huā duniyā meñ yuuñ mash.hūr 'nāz'
shaan se tābūt uTThā dhuum kā mātam huā

isī dhun meñ to ham āvāra phirā karte haiñ
kahīñ shāyad tire āñchal kī havā mil jaa.e

chhū ga.ī kāfir havā kis kī nigāh-e-garm se
phuul kumlāyā huā hai kuchh gul-e-ruḳhsār kā

darmāñ se aur dard hamārā huā do-chand
marham se daaġh siine meñ nāsūr paḌ gayā

guldasta ban ke raunaq-e-bazm-e-shahāñ huā
kuuḌā jo us faqīr ke takiye se jhaḌ gayā

abr kā TukḌā ho jaise chāñd par Thahrā huā
yuuñ tire mukhḌe pe zulfoñ kā ghanā saaya huā

qurb kī lazzat se āñkhoñ meñ ghaTā sī chhā ga.ī
aur ye dil hai sharābī kī tarah bahkā huā

dil samajhtā hai tirī raftār ke uslūb ko
tū abhī aayā nahīñ aur hashr sā barpā huā

āshnā.ī kī havā dil ke chaman meñ kyā chalī
har gul-e-manzar nazar aayā mujhe dekhā huā

ab kisī ġham kā sitāra bhī nahīñ raushan 'nadīm'
kyā mirī āñkhoñ meñ koī chāñd hai niklā huā

tā-umr rahe ham go sargarm-e-amal
hāsil na huā kuchh bhī ba-juz tūl-e-amal

mirī be-kasī se jahān meñ na huā bhī kuchh to bahut huā
vahī bebasī to rahī magar tirī yaad dil meñ basī rahī

dil-jūī kā andāz bhī narmī bhī vahī hai
siine pe havā rakhtī hai jo haat vo tum ho

ab jo ā.ankhoñ meñ dhuāñ hai to shikāyat kaisī
yaar ḳhud hī to charāġhoñ ko havā dī us ne

ham se agar hai tark-e-ta.alluq to kyā huā
yaaro koī to un kī ḳhabar pūchhte chalo

kuchh aisī chal rahī thī havā dil nahīñ lagā
mele meñ zindagī ke zarā dil nahīñ lagā