Tags-Hawa

sūraj to jā ke chain se bistar pe so gayā
shab bhar magar charāġh havā meñ lagā rahā

shadīd habs meñ rāhat havā se hotī hai
bahāl apnī tabī.at havā se hotī hai

koī charāg jalātā nahīñ salīqe se
magar sabhī ko shikāyat havā se hotī hai

lachak ke TuuT na jaa.e kahīñ ye shāḳh-e-badan
chale jo tez to vahshat havā se hotī hai

kahīñ dhuveñ ke sivā kuchh nazar nahīñ aatā
kabhī kabhī vo sharārat havā se hotī hai

havā se kah do ki kuchh der ko Thahar jaa.e
ḳhajil hamārī ibārat havā se hotī hai

azal se us kī tabī.at meñ sar-kashī hai 'talab'
kahāñ kisī kī itā.at havā se hotī hai

harīf-e-sail-e-havādis to hai safīna-e-qaum
jo nazr-e-mauj huā nā-ḳhudā to kyā hogā

taras rahā hai zamāna sukūn-e-dil ke liye
sukūn-e-dil na mayassar huā to kyā hogā

abhī apne martaba-e-husn se miyāñ bā-ḳhabar tū huā nahīñ
ki ġhazal-sarā tire baaġh meñ koī murġh-e-tāza-navā nahīñ

jo tere naam se mansūb merā naam huā
to shahr bhar ko adāvat bhī merī jaañ se huī

phir fazāoñ meñ suḳhan gholne bādal aa.e
phir chalī tez havā aur shajar bol paḌā

barq chamkī thī ek baar yahāñ
kyā huā āshiyāñ nahīñ ma.alūm

mire aa.ine se judā huā jo charāġh-e-hijr to ye khulā
chaman-e-sitāra-o-rañg meñ bhī kahīñ qayām hai abr kā

kar to diiñ maiñ ne charāġhoñ kī qatāreñ raushan
hai zamāne kī magar tez havā bhuul gayā

abhī to pahle paroñ kā bhī qarz hai mujh par
jhijak rahā huuñ na.e par nikāltā huā maiñ

lan-tarānī hī rahī us shoḳh ko ushshāq se
hausla paidā na kis kis ko huā go diid kā

mar gayā ashk jo āñkhoñ se bahe aah ke saath
aa ga.ī niiñd havā meñ lab-e-sāhil mujh ko

kyā adāvat hai ki jis din se huā huuñ zaḳhmī
dekh jaatā hai vo rashk-e-mah-e-kāmil mujh ko

ye kin hadoñ meñ hamārā dil-e-ġharīb aayā
sahar kī chaap pe ḳhadsha huā raqīb aayā