Tags-Hawa

maiñ kis kī khoj meñ yuuñ hī bitā rahā huuñ janm
chhupā huā mire saa.e meñ kis kā paikar hai

sunā rahī hai havā apne hī safar-nāme
ajiib shor ghane jañgaloñ ke andar hai

kohra sā bharā huā hai 'ḳhāvar'
āñkhoñ ke udaas jhoñpaḌoñ meñ

ye baat alag hai ki maiñ jiitā huuñ abhī tak
hone ko to sau baar mirā qatl huā hai

maqtūl kī jabīñ pe hai qātil likhā huā
kyā faisla ho kal sar-e-darbār dekhnā

naav bhañvar meñ aa.ī hai ab bachnā huā muhāl bahut
jo honā hai so hogā kyā hogā jī bahlāne se

ye chashm-e-nam ki hai dānā-e-ġham baḌī shai hai
chhupā huā hai isī ḳhaak meñ ḳhazīna bhī

ham to tamām umr tirī hī adā rahe
ye kyā huā ki phir bhī hamīñ bevafā rahe

sub.h kī havā un se sirf itnā kah denā
koī sham.a kī ab tak lau baḌhā.e baiThā hai

in dinoñ sab ko huā hai sāf-goī kā talāsh
naam ko charchā nahīñ 'hātim' kahīñ īhām kā

jise tū ne samjhā hai zindagī usī inqalāb kā naam hai
kabhī din huā kabhī shab huī kabhī sub.h hai kabhī shaam hai

na jaane kab ruḳh havā badal de bhaḌak uTheñ phir vo bujhte sho.ale
hirās hai vo fazā pe taarī kahīñ bhī mahfūz ghar nahīñ hai

ruḳh havā kā na dekhiye 'anjum'
dekhiye bādbān meñ kuchh hai

har havā-ḳhvāh ye kahtā thā ki mahfūz huuñ maiñ
bujhne vāloñ meñ mirā naam nahīñ aa saktā

havā kā lams ye būñdeñ ḳhunuk ḳhunuk 'ḳhurshīd'
mujhe to aaj fazāoñ meñ gholtā hai koī

kahāñ nujūm kahāñ rāste kī gard-e-haqīr
ajiib vahm huā tere saath chal ke mujhe

ārām se qafas meñ guzārūñgā zindagī
achchhā huā ki tāqat-e-parvāz hī nahīñ

zehn par bojh rahā, dil bhī pareshān huā
in baḌe logoñ se mil kar baḌā nuqsān huā

maat ab ke bhī charāġhoñ ko huī hai lekin
chaak is baar havā kā bhī garebān huā

oḌhe phirtā huuñ shahādat kī lahū-rañg qabā
rañg terā thā so vo hī mirī pahchān huā