Tags-Hawa

niklā huuñ lafz lafz se maiñ Duub Duub kar
ye terā ḳhat hai yā koī dariyā chaḌhā huā

kuchh bhī hoñ mauj o havā ke tevar
jism parvarda-e-tūfāñ hai bahut

jism meñ gūñjtā hai ruuh pe likkhā dukh hai
tū mirī aañkh se bahtā huā pahlā dukh hai

ik raat vo gayā thā jahāñ baat rok ke
ab tak rukā huā huuñ vahīñ raat rok ke

vo jo paanī ke ghar meñ rahtā hai
aag lagne pe bas havā degā

barsoñ se bichhḌā huā terā ġham 'pāshī'
aaj achānak milā hai gale lagāne do

ḳhabar nahīñ bhī havā ko to baaġh jāntā hai
jo maiñ ne rañj uThā.e haiñ zard beloñ ke

tamām umr ye uqda na vā huā mujh par
ki haath meñ thā yā chashm-e-ḳhizar meñ paanī thā

ahvāl-e-mazāhib se ye sābit huā ham ko
ik baat hai jis kā ka.ī sūrat se bayāñ hai

hameñ nasīb huā aisī manziloñ kā safar
qadam qadam pe jahāñ rāsta badaltā hai

jur.at-e-parvāz ke anjām se vāqif huuñ maiñ
ḳhuun meñ Duubā huā ye bāl-o-par dekheñge log

koyal kī surīlī tānoñ par tham tham ke papīhā gaatā hai
hal ho ke havā kī lahroñ meñ sāvan kā mahīna aatā hai

sahrā meñ havā bal khātī hai bādal ko sabā sankātī hai
paanī se zamīñ narmātī hai sabzoñ se fazā lahrātī hai

ufuq pe duur chamaktā huā koī taarā
mujhe charāġh-e-dayār-e-habīb lagtā hai

shab-e-tārīk ne rakhā thā bharam kitnoñ kā
jab lagī aag ujālā huā saa.e na chhupe

bas ki fa.ālummā-yurīd hai aaj
har silah shor englistāñ kā

jis qadar vo mujh se bigḌā maiñ bhī bigḌā us qadar
vo huā jaame se bāhar maiñ bhī nañgā ho gayā

karte haiñ ġhalat yaar se iz.hār-e-vafā ham
sābit jo huā ishq kujā yaar kujā ham

shorish-e-paiham bhī hai afsurdagi-e-dil bhī hai
zindagī bahtā huā dhārā bhī hai sāhil bhī hai

tire ḳhilāf kiyā jab bhī ehtijāj ai dost
mirā vajūd bhī shāmil nahīñ huā mire saath