Tags-Gham

ġham kī maujoñ meñ dil kī
naav bahtī jaatī hai

sun na sake usī ko vo kah na sakā usī ko maiñ
aish kī dāstāñ meñ jo haal thā ġham kā muḳhtasar

ġham meñ bhī hai surūr vo hañgām aa gayā
shāyad ki daur-e-bāda-e-gulfām aa gayā

kyā kyā farāġhateñ thiiñ mayassar hayāt ko
vo din bhī the ki tere sivā koī ġham na thā

tū mirī sarguzisht-e-ġham sun ke karegā kyā nadīm
vaqf-e-ḳhalish hai har-nafas dard hai baat baat meñ

jis kā aniis terā ġham jis kī rafīq terī yaad
us ko milā sukūn-e-dil bazm-e-taġhayyurāt meñ

ġham nahīñ lā-hāsilī kā ishq kā hāsil hai ye
ai hisāb-e-zindagī tujh ko to puurā kar diyā

turfa sitam haiñ charḳh kī ye āzmā.isheñ
vo bhī sharīk-e-ġham haiñ dil-e-pur-mehan ke saath

ik samundar ke havāle saare ḳhat kartā rahā
vo hamāre saath apne ġham ġhalat kartā rahā

haañ use shā.er zamāna kah rahā hai in dinoñ
jo divāna apne ġham kī tarbiyat kartā rahā

qissa kitāb-e-umr kā kyā muḳhtasar huā
ruḳh dāstān-e-ġham kā idhar se udhar huā

ġham-e-hayāt se itnī bhī hai kahāñ fursat
ki terī yaad meñ jī bhar ke ro liyā jaa.e

unheñ bhī bhuul chukā huuñ maiñ ai ġham-e-daurāñ
ab is ke ba.ad batā aur kyā kiyā jaa.e

ham ko to ehtiyāt-e-ġham-e-dil aziiz thī
kuchh is liye bhī kam-nigahī kā gilā na thā

hameñ kab zeb detā hai ki aañsū un ko dikhlā.eñ
ham apnī dāstān-e-ġham unheñ hañs kar sunā.eñge

sunñe vaale ro diye sun kar marīz-e-ġham kā haal
dekhne vaale taras khā kar duā dene lage

ġham se ab hogī barāh-e-rāst merī guftugū
dosto tīmār-dāro ġham-gusāro taḳhliya

yāqūb tire ġham satī ai yūsuf-e-misrī
bekal hai shitābī satī kan.āñ kuuñ pahuñch tuuñ

ranj-o-ġham to pahle hī kuchh kam na the
yaad terī kyuuñ hameñ taḌpā ga.ī

qismat meñ ḳhushī jitnī thī huī aur ġham bhī hai jitnā honā hai
ghar phūñk tamāshā dekh chuke ab jañgal jañgal ronā hai