Tags-Gham

vo intishār-e-ġham-e-zīst meñ jilā degā
magar usī ko ḳhushī kī kitāb detā chal

tere aane kī masarrat se sahar ho raushan
aur rātoñ kī tire ġham meñ siyah-poshī ho

koī aalam ho najāt-e-ġham-e-daurāñ ke liye
maut ho niiñd ho be-hoshī ho

sham.a raushan koī kar de mire ġham-ḳhāne meñ
jaane kab se yahāñ baiThā huuñ sanam-ḳhāne meñ

lazzat-e-sozish-e-ġham jān-e-vafā aah na pūchh
kitnī taskīn milī aap ko taḌpāne meñ

dil meñ ab koī bhī hasrat nahīñ armān nahīñ
kuchh nahīñ kuchh bhī nahīñ ab mire ġham-ḳhāne meñ

yuuñ jo murjhā ga.e baġhair khile
ġham hai aise tamām phūloñ kā

kyā ḳhabar tujh ko guzārī kaise maiñ ne shām-e-ġham
āñsuoñ kā paanī le kar maiñ vuzū kartī rahī

tā dam-e-marg ġham ḳhushī kā nahīñ
dil-e-āzurda gar salāmat hai

ye aur baat hai ki madavā-e-ġham na thā
lekin tirā ḳhulūs tavaqqo se kam na thā

kyā kyā farāġhateñ thiiñ mayassar hayāt ko
vo din bhī the ki tere sivā koī ġham na thā

aa.e haiñ yaad tujh se bichhaḌ kar vo log bhī
jin se ta.alluqāt bigaḌne kā ġham na thā

hañse bhī ro.e bhī lekin na samjhe
ḳhushī kyā chiiz hai duniyā meñ ġham kyā

us ko kho dene kā ehsās to kam baaqī hai
jo huā vo na huā hotā ye ġham baaqī hai

is cocktail kā to nasha hī kuchh aur hai
ġham ko ḳhushī ke saath milā kar sharāb pī

tumheñ ġhairoñ se kab fursat ham apne ġham se kam ḳhālī
chalo bas ho chukā milnā na tum ḳhālī na ham ḳhālī

chashm-e-karam kā shukriya pursish-e-ġham se fā.eda
kyā mirī bebasī kā haal aap par ā.īna nahīñ

muñh chhupānā paḌe na dushman se
ai shab-e-ġham sahar na ho jaa.e

ishq mahv-e-ġham-e-zindagī ho gayā husn madhosh-e-ishva-tarāzī rahā
ahl-e-dil hosh meñ aa chuke haiñ magar hai vahī ālam-e-dil-barāñ aaj tak

tanhā.ī kā ġham Dho.eñ aur ro ro jī halkān kareñ
is se behtar hogā ki vo mashq-e-tīr-e-kamān kareñ