Tags-Gham

'saifī' fishār-e-ġham kī tamāzat ke bāvajūd
hairat hai apnī baat nibhātā rahūñ maiñ

ham apne dard havāoñ se bhī nahīñ kahte
uThā.e phirte haiñ ḳhud apne ġham dar-o-dīvār

pursish-e-ġham ko ḳhud nahīñ aa.e un kā magar paiġhām to aayā
hijr kī rut meñ jān-e-hazīñ ko duur kī ye shahnā.ī bahut hai

duur se roz-e-masarrat kā dikhā kar bādal
ġham kī karte haiñ jo barsāt to dukh hotā hai

mujhe ḳhabar hai mire ghar meñ saañp āñkheñ haiñ
vagarna ġham ke ḳhazīne chhupā ke rakhtī kyuuñ

āñkhoñ meñ dekh shahr-e-ḳhamoshāñ kā sā sukūt
palkoñ pe dekh ġham ke fasāne likhe hue

rañg bhar kar tirī tasvīr meñ jazb-e-ġham kā
apnī tasvīr banā dī tire saudā.ī ne

ham ne sochā thā ki bujh jā.eñge ġham ke sho.ale
aa ke kuchh aur havā dī unheñ purvā.ī ne

us galī meñ hazār ġham TuuTā
aanā jaanā magar nahīñ chhūTā

bahut bār-e-garāñ ye zindagī ma.alūm hotī hai
ki ġham kā pesh-ḳhema har ḳhushī ma.alūm hotī hai

kisī se sarguzisht-e-ġham bayāñ kartā huuñ jab apnī
kahānī vo sarāsar aap kī ma.alūm hotī hai

ġham kā iz.hār bhī karne nahīñ detī duniyā
aur martā huuñ to marne nahīñ detī duniyā

sej phūloñ kī banā.ūñgī maiñ pītam ke liye
barrā se kah do ki ab fursat nahīñ ġham ke liye

ye sitam ye dard ye ġham aur alam mujh par huā
kaash ki tujh se maiñ ai zālim na hotā āshnā

kis tarah ġham ko chhoḌ duuñ yak-laḳht
is se rishta bahut purānā hai

ab zauq kī mānind ġham-e-ishq jigar meñ
kāñTā sā khaTaktā hai nikal jaa.e to achchhā

maiñ kah detā huuñ ho aa kar zulf ke kūche meñ dam-bhar ko
kisī din jab bahut muztar dil-e-ġhamnāk hotā hai

ashk aayā aañkh meñ jaltā huā
aaj soz-e-ġham kā andāza huā

dil vo kyā jo ġham se ho nā-āshnā
ġham vo kyā jis kā ki andāza huā

aap se pahle kahāñ ġham se shanāsā.ī thī
mil ga.e aap to har ġham se shanāsā.ī hai