Tags-Gham

jaao mātam guzāro jaane do
jis kā ġham hai use manāne do

āsmāñ kā na rahā aur zamīñ kā na rahā
ġham kī jo shāḳh se TuuTā vo kahīñ kā na rahā

nahīñ hai maslahat-e-ġham ko aarzū tirī
tirā jo ġham bhī na hotā to aañkh nam hotī

Thahar na jaatā agar maiñ farāz par 'māmūn'
talāsh-e-ġham bhī mirī hāsil-e-adam hotī

jab koī ġham hī na ho ashk bahā.ūñ kaise
ḳhud ko duniyā kī adākārī sikhā.ūñ kaise

ḳhud-baḳhud āñkhoñ ke paimāne chhalak paḌte haiñ
shiddat-e-ġham ko chhupā.ūñ to chhupā.ūñ kaise

koī tamannā koī masarrat dil ke qarīb aane hī na dī
kis ne kī hai ishq meñ yaaro ġham se mohabbat ham se ziyāda

tumhāre ġham ne vo sūrat mirī banā.ī hai
ki ro rahe haiñ mire haal par dar-o-dīvār

bahut ai dil tirī rūdād-e-ġham ne tuul khīñchā hai
kabhī vo but bhī sunñe ko ye qissa muḳhtasar aayā

najāt dī ġham-e-duniyā se dard-e-dil ne mujhe
ye ek raah milī ġham se chhūT jaane kī

'kāvisham' kyā hai samajh meñ kabhī aa jā.egā
ġham-zada giit samajh kar kabhī gā lo mujh ko

kis ko us kā ġham ho jis dam ġham se vo zaarī kare
haañ magar terā hī ġham āshiq kī ġham-ḳhvārī kare

hijrat-o-hijr se bachā.e ḳhudā
mujh ko lāhaq haiñ aaj ġham donoñ

ai zindagī mujhe to ḳhabar tak na ho sakī
har-chand apne ġham kā mudāvā to maiñ bhī huuñ

mahrūmī-e-hayāt kā mujh ko bhī ġham to hai
mahrūmī-e-hayāt pe rotā to maiñ bhī huuñ

maiñ bhī dukhoñ se māvarā kab huuñ jahān meñ
bār-e-ġham-e-hayāt uThātā to maiñ bhī huuñ

udhar qismat hai jo har dam nayā ġham ham ko detī hai
idhar ham haiñ ki har ġham ko hamesha dil meñ paalā hai

is se behtar kahāñ iz.hār-e-ġham-e-dil karte
yuuñ tarāshā kiye lafzoñ ke badan dānista

ġham ko rañgīn banā deñge mohabbat ke ḳhutūt
aap kuchh ham ko likheñ aap ko kuchh ham likkheñ

kaun jaane ki ik tabassum se
kitne mafhūm-e-ġham nikalte haiñ