Tags-Gham

vasl kī shīrīnī meñ pinhāñ hijr kī talḳhī bhī hai kam kam
tum se milne kī bhī ḳhushī hai tum se judā hone kā bhī ġham

hosh-o-havās jab se hamāre chale ga.e
jo yār-e-ġham-gusār the saare chale ga.e

badalte rahte haiñ har moḌ par safar ke rafīq
ġham-e-hayāt magar saath saath chaltā hai

sozish-e-shola-e-furqat se fanā ho jaanā
maraz-e-ġham ke liye hai ye davā ho jaanā

shab-e-ġham dil se 'jamīla' ne yahī ro ke kahā
mil ke miTTī meñ to naqsh-e-kaf-e-pā ho jaanā

dekhūñ to mire ġham meñ sharīk ek zamāna
sochūñ to yahāñ koī makīñ hai na makāñ hai

mere ġham-ḳhāne kī qismat jab raqam hone lagī
likh diyā min-jumla-e-asbāb-e-vīrānī mujhe

kyā batā.eñ ham dil par 'shād' kyā guzartī hai
ġham chhupānā paḌtā hai jab ḳhushī ke paikar meñ

kamāl-e-zabt-e-ġham se ye gavārā hī nahīñ mujh ko
ki harf-e-ārzū sharminda-e-iz.hār ho jaa.e

tumheñ ai arsh kyuuñ hai tīr-e-ġham se itnī be-zārī
yahī behtar hai ye nāvak jigar ke paar ho jaa.e

phir de ke ḳhushī ham use nāshād kareñ kyuuñ
ġham hī se tabī.at hai agar shaad kisī kī

ġham hai ik kaif meñ fazā.e-hayāt
ḳhāmushī sajda-e-niyāz meñ hai

mai nahīñ hai to ashk-e-ġham hī sahī
pī bhī jaao bahār ke din haiñ

ab us ko sochte haiñ aur hañste jaate haiñ
ki tere ġham se ta.alluq rahā hai kitnī der

ye qissa-e-ġham-e-dil hai to bāñkpan se chale
kisī nigāh pe Thahre kisī badan se chale

mire vajūd meñ aisā samā gayā koī
ġham-e-zamāna nahīñ fikr-e-māh-o-sāl nahīñ

kunj-e-ġham meñ ik gul bhī likh nahīñ sakā puurā
is balā kī tezī se sarsar-e-tarab guzrī

tere ġham kī ḳhushbū se jism o jaañ mahak uTThe
saañs kī havā jab bhī chhū ke mere lab guzrī

ḳhūn-e-dil khāne se kuchh inkār hai
jab nahīñ ai lazzat-e-ġham khā.eñ kyā

maiñ ne paidā nahīñ kiyā lekin
tere har ġham ko paal saktā huuñ