Tags-Duniya

kis tarah kareñ us kī mohabbat pe bharosā
ai dost qayāmat kī adākār hai duniyā

is tarah bhī duniyā kā gilā karte haiñ goyā
ma.asūm hai insān gunahgār hai duniyā

duniyā meñ burā vaqt to aatā hai sabhī par
ab ḳhud hī bure vaqt se do-chār hai duniyā

rah rah ke barastī haiñ adāvat kī ghaTā.eñ
lagtā hai ki girtī huī dīvār hai duniyā

kyā kahiye use kuchh bhī samajh meñ nahīñ aatā
ik vādī-e-pur-ḳhār ki gulzār hai duniyā

jannat bhī usī meñ hai jahannam bhī usī meñ
gahvāra-e-har-ishrat-o-āzār hai duniyā

Duube hue tāroñ kā ye mātam nahīñ kartī
chaḌhte hue sūraj kī parastār hai duniyā

rañj se ishq ke hai rāht-e-duniyā bad-tar
zaḳhm-e-ḳhandāñ huuñ agar maiñ gul-e-ḳhandāñ māñgūñ

na jaane kitne aalam haiñ 'mujībī' ek aalam meñ
agar duniyā ko duniyā se kināra kar ke dekhā jaa.e

ilāhī ḳhair us ke sañg-e-dar kī na ho kahīñ sarf-e-shauq vo bhī
ki zauq-e-sajda kī ek duniyā mirī jabīn-e-niyāz meñ hai

bas nahīñ chaltā hai varna apne mar jaane ke saath
pheñk dete khod kar duniyā kī sab buniyād ham

jo zehn meñ tasvīr hai kāġhaz par utar aa.e
duniyā meñ numā.ish kā bhī haq chāhiye mujh ko

ḳhalā meñ tair rahā hai savāl duniyā kā
ḳhudā ko aa.egā kis din ḳhayāl duniyā kā

ye aur baat ki jannat yaqīñ se aage thī
vahāñ bhī saath gayā ehtimāl duniyā kā

hamāre nāma-e-a.amāl meñ likhā us ne
urūj-e-ādam-e-ḳhākī zavāl duniyā kā

ye vāqi.a hai ki insān mar gayā pahle
phir is ke ba.ad huā intiqāl duniyā kā

koī ḳhabar nahīñ kis vaqt aur kahāñ gir jaa.e
ḳhudā ke haath se jām-e-sifāl duniyā kā

hazār mail ko dhoyā hazār sābun se
kisī tarah bhī na chhūTā ḳhayāl duniyā kā

ajiib rañg kā piñjra hai āsmāñ nīche
tilism-e-ġhaib hai 'ḳhurshīd' haal duniyā kā

chhoḌ ke māl-o-daulat saarī duniyā meñ apnī
ḳhālī haath guzar jaate haiñ kaise kaise log