Tags-Dil

dil ko kho.e ek muddat ho ga.ī
ai 'asar' ab DhūñDne se paa.eñ kyā

āvāz ke hisār meñ dil ab bhī qaid hai
māñge hai ab bhī pairahan-e-lafz har umañg

kuchh tajraba bhī ab to zamāne kā ho gayā
kuchh dal ke bachpane se bhī ham aa ga.e haiñ tañg

ābād ḳhayāl us kā shādāñ rahe yaad us kī
ik dushman-e-dil aayā ik āfat-e-jāñ aa.ī

ajab tarah se maiñ sarf-e-malāl hone lagā
jo shahr kā hai vahī dil kā haal hone lagā

ek inkār kī ḳhvāhish ko chhupā.e dil meñ
gird-e-iqrār meñ baiThe haiñ miyāñ tum aur maiñ

maiñ ne pūchhā ki koī dil-zadagāñ kī hai misāl
kis tavaqquf se kahā us ne ki haañ tum aur maiñ

dil mirā be-qarār rahtā hai
ik tirā intizār rahtā hai

vo kaTā sā rahā zamāne se
us ke dil meñ ġhubār rahtā hai

apne dil ko sambhāl saktā huuñ
tujh ko hairat meñ Daal saktā huuñ

kam na samjho ye ātish-e-dil hai
maiñ samundar ubaal saktā huuñ

botaleñ khol kar to pī barsoñ
aaj dil khol kar bhī pī jaa.e

khol dete haiñ palaT aane pe darvāza-e-dil
aane vaale kā irāda nahīñ dekhā jaatā

ye saarā fāsla dil kā hai varna
miyān-e-dasht-o-dar kuchh bhī nahīñ hai

saarā hisāb-e-jān-o-dil rakkhā hai tere sāmne
chāhe to de amaañ mujhe chāhe to darguzar na kar

kahīñ se koī tamannā duā meñ aa na sake
mire ḳhudā tū mire dil ko be-zabāñ kar de

maiñ apne dil kī har ek baat us se kah dūñgā
sune to suntā rahe vo kahe to haañ kar de

ho ga.ī dil se tirī yaad bhī ruḳhsat shāyad
āh-o-zārī kā abhī shor uThā hai mujh meñ

apnī apnī zaat meñ gum haiñ ahl-e-dil bhī ahl-e-nazar bhī
mahfil meñ dil kyuuñ kar bahle mahfil meñ tanhā.ī bahut hai

dil kī kitābeñ paḌh nahīñ saktā lekin chehre paḌh letā huuñ
Dhaltī umr kī dhuup meñ 'sāhir' itnī bhī bīnā.ī bahut hai