kyā batā.ūñ ki jo hañgāma bapā hai mujh meñ
in dinoñ koī bahut saḳht ḳhafā hai mujh meñ
us kī ḳhush-bū kahīñ atrāf meñ phailī huī hai
sub.h se raqs-kunāñ bād-e-sabā hai mujh meñ
terī sūrat meñ tujhe DhūñD rahā huuñ maiñ bhī
ġhāliban tū bhī mujhe DhūñD rahā hai mujh meñ
ek hī samt har ik ḳhvāb chalā jaatā hai
yaad hai yā koī naqsh-e-kaf-e-pā hai mujh meñ
merī be-rāh-ravī is liye sarshār sī hai
mere haq meñ koī masrūf-e-duā hai mujh meñ
apnī sāñsoñ kī kasāfat se gumāñ hotā hai
koī imkān abhī ḳhaak huā hai mujh meñ
ik chubhan hai ki jo bechain kiye rahtī hai
aisā lagtā hai ki kuchh TuuT gayā hai mujh meñ
yā to maiñ ḳhud hī rihā.ī ke liye huuñ be-tāb
yā giraftār koī mere sivā hai mujh meñ
ā.īna is kī gavāhī nahīñ detā to na de
vo ye kahtā hai koī ḳhaas adā hai mujh meñ
ho ga.ī dil se tirī yaad bhī ruḳhsat shāyad
āh-o-zārī kā abhī shor uThā hai mujh meñ
mujh meñ ābād haiñ ik saath adam aur vajūd
hast se bar-sar-e-paikār fanā hai mujh meñ
majlis-e-shām-e-ġharībāñ hai bapā chaar pahr
mustaqil bas abhī māhaul-e-azā hai mujh meñ
ho ga.ī shaq to bil-āḳhir ye anā kī dīvār
apnī jānib koī darvāza khulā hai mujh meñ
ḳhuuñ bahātā huā zanjīr-zanī kartā huā
koī pāgal hai jo behāl huā hai mujh meñ
us kī ḳhush-bū se mo.attar hai mirā saarā vajūd
tere chhūne se jo ik phuul khilā hai mujh meñ
mujh sā be-māyā kahāñ aur kahāñ zom-e-kalām
ai mire rabb-e-suḳhan terī atā hai mujh meñ
tere jaane se yahāñ kuchh nahīñ badlā maslan
terā baḳhshā huā har zaḳhm harā hai mujh meñ
kaise mil jaatī hai āvāz-e-azāñ se har sub.h
raat bhar gūñjne vaalī jo sadā hai mujh meñ
kitnī sadiyoñ se use DhūñD rahe ho ba-sūd
aao ab merī taraf aao ḳhudā hai mujh meñ
mujh meñ jannat bhī mirī aur jahannam bhī mirā
jārī-o-sārī jazā aur sazā hai mujh meñ
raushnī aise dhaḌakte to na dekhī thī kabhī
ye jo rah rah ke chamaktā hai ye kyā hai mujh meñ