Tags-Dil

duā karo ki maiñ us ke liye duā ho jā.ūñ
vo ek shaḳhs jo dil ko duā sā lagtā hai

chhāyā hai 'qatīl' akasr dil par nādīda nazāroñ kā jaadū
ham bādiya-paimā the lekin phir bhī chamanoñ kī yaad aa.ī

mujhe phūñkne se pahle mirā dil nikāl lenā
ye kisī kī hai amānat mire saath jal na jaa.e

hijr huuñ puurā hijr huuñ ishq visāl kare
dil kī dhaḌkan taal ho jism dhamāl kare

phailī shamīm-e-yār mire ashk-e-surḳh se
dil ko ġhazab fishār huā pech-o-tāb meñ

chīn-e-jabīñ ko dekh ke dil basta-tar huā
kaisī kushūd-e-kār kushād-e-naqāb meñ

aañkh us kī phir ga.ī thī dil apnā bhī phir gayā
ye aur inqilāb huā inqilāb meñ

matlab kī justujū ne ye kyā haal kar diyā
hasrat bhī ab nahīñ dil-e-nākām-yāb meñ

nāseh hai aib-jū o dil-āzār is qadar
goyā savāb hai suḳhan-e-nā-savāb meñ

terī jafā na ho to hai sab dushmanoñ se amn
badmast ġhair mahv dil aur baḳht ḳhvāb meñ

rū-ba-rū dil ke hai vo shoḳh-nazar
barq kī zad meñ āshiyānā hai

betābī-e-dil kī ye davā ḳhuub hai lekin
pahlū meñ ye sharbat kī dukāñ maar na Daale

ab daulat-e-dil haar ke rotā hai 'muzaffar'
muflis ko ye ehsās-e-ziyāñ maar na Daale

us zulf ke saude kā ḳhalal jaa.e to achchhā
us pech se dil apnā nikal jaa.e to achchhā

is ziist se ab maut badal jaa.e to achchhā
bechain hai dil jaan nikal jaa.e to achchhā

is ishq meñ phir jaan ke paḌ jā.eñge laale
ab bhī dil-e-betāb sambhal jaa.e to achchhā

kyā ishq sā hai ishq mohabbat sī mohabbat
badlūñgā maiñ is dil ko badal jaa.e to achchhā

zehnoñ pe musallat haiñ siyah soch ke bādal
zulmat meñ diyā dil kā jalānā to paḌegā

bekasī hai aur dil nāshād hai
ab inhīñ donoñ se ghar ābād hai

bebasī ban kar na Tapke aañkh se
dil meñ jo ik hasrat-e-fariyād hai