Tags-Dil

hazār fasl-e-gul aa.e junūñ! vo josh kahāñ
gayā shabāb ke ham-rāh valvala dil kā

ḳhudā ke haath hai ab apnā ai 'qalaq' insāf
butoñ se hashr meñ hogā muāmla dil kā

kab thā ye shor-e-nauha tirā ishq jab na thā
dil thā hamārā aage tū mātam-sarā na thī

sarā-e-dil meñ jagah de to kaaT luuñ ik raat
nahīñ hai shart ki mujh ko sharīk-e-ḳhvāb banā

le ke dil kahte ho ulfat kyā hai
husn vaalo ye sharārat kyā hai

na dil churāte hamārā na tum ḳhajil hote
pa.e-hijāb hai nīchī nigāh kī taḳhsīs

jal rahī hai dil meñ ik āfāq se rishte kī lau
jaise ham dekhe haiñ sū-e-asmāñ dekhegā kaun

rafta rafta ho rahegā zaḳhm-e-dil kā indimāl
bujhte bujhte bujh hī jā.egī fuġhāñ dekhegā kaun

dekh dil meñ ho rahā hai ik nayā manzar tulūa
jo idhar bikhrī paḌī hai kahkashāñ dekhegā kaun

kyā kah ga.ī kisī kī nazar kuchh na pūchhiye
kyā kuchh huā hai dil pe asar kuchh na pūchhiye

ab un kī kufr-sāmānī bhī 'ātish'
dil-o-jāñ par ibārat ho ga.ī hai

chup rahe ham to ḳhuuñ huā dil kā
baat kī hai to aañkh bhar aa.ī

kuchh aur ho na ho chalo apnā hī dil jale
itnā bhī apnī aah meñ lekin asar nahīñ

dahan-e-sher meñ jā baiThe lekin ai dil
na khaḌe ho jiye ḳhūbān-e-dil-āzār ke paas

khilte haiñ kidhar gul dil-e-sad-chāk bahut haiñ
dāman haiñ kahāñ dīda-e-namnāk bahut haiñ

shahr-e-dil vīrāna kardam pā-ba-jaulāñ mī-kunī
jī khiñchā jaatā hai apnā ab to sahrā kī taraf

dil ke madfan pe nahīñ koī bhī rone vaalā
apnī dargāh ke ham ḳhud hī mujāvir Thahre

ruḳh-e-jānāñ ke tasavvur hī meñ rāteñ guzrīñ
chāñd-tāre dil-e-mahjūr kī duniyā na bane

mirā dard pūchhā mirā haal dekhā mire dil kā armān tum ne nikālā
ḳhudā aur bhī de zyāda marātib sivā aur is se bhī ho bol-bālā

vo aa.e the pahlū meñ behosh thā maiñ huī hogī dil par bahut kuchh navāzish
magar kyā ḳhabar mujh ko allāh jaane tamannā nikālī ki kāñTā nikālā