Tags-Dil

aql kahtī hai dobāra āzmānā jahl hai
dil ye kahtā hai fareb-e-dost khāte jā.iye

bhaTak ke koī gayā dair ko koī ka.abe
ajiib bhūl-bhulayyāñ hai marhala dil kā

ye dukhtī nigāhoñ se ghūrā mujhe
ki dukhne mire dil kā phoḌā lagā

jin ke dāman tahī aur ḳhālī the dil jin kī jur.at thī kam aur jaañ muzmahil
āstānoñ pe sajde vo karte rahe rafta rafta hamāre ḳhudā ho ga.e

is zamāne ke jo mīr-o-sultān the nau-e-ādam meñ ya.anī jo insān the
dil se paa.ī unhoñne vo nashv-o-numā tere kūche ke āḳhir gadā ho ga.e

shor sīnoñ meñ uTh uTh ke dabte rahe dil-jigar duur gurdoñ meñ khapte rahe
haath kitne the yaañ jo qalam ho ga.e saaz kyā kyā the jo be-sadā ho ga.e

ab na ḳhatra hai dil meñ na koī ḳhalish ek baaqī rahā hai to rañg-e-tapish
dil subuk aur saada hai is taur se qarz jitne the goyā adā ho ga.e

talātumoñ kī sifat ishq meñ rahī har-dam
safīna dil kā musalsal hai tez dhāre meñ

jalā sake jo dil-o-jāñ vahī nazar qātil
vagarna soz-o-tapish hai kahāñ sharāre meñ

hamāre dāġh-e-dil zaḳhm-e-jigar kuchh milte-julte haiñ
guloñ se gul-ruḳhoñ se mah-vashoñ se māh-pāroñ se

kabhī patthar ke dil ai 'kaif' pighle haiñ na pighleñge
munājātoñ se fariyādoñ se chīḳhoñ se pukāroñ se

milo ḳhalvat meñ aur do tum mujhe dars-e-shakebā.ī
karam tum meñ na ho to dil mirā sabr-āzmā kyuuñ ho

zaḳhm-e-dil ko tasalliyāñ de do
mere phūloñ ko titliyāñ de do

dil de kar paa.e haiñ aañsū
ishq ke ye nazrāne dekhe

ḳhush huuñ tire kiine se ki shirkat se huuñ mahfūz
jitnā tire dil meñ hai vo mere liye sab hai

terī bāteñ hī sunāne aa.e
dost bhī dil hī dukhāne aa.e

dil dhaḌaktā hai safar ke hañgām
kaash phir koī bulāne aa.e

ab to rone se bhī dil dukhtā hai
shāyad ab hosh Thikāne aa.e

dil sañg-e-malāmat se hinā-rañg hai lekin
kuchh aur rifāqat kā sila chāhiye yaaro

kahtī hai ruuh dil se dam-e-naz.a hoshiyār
ham to adam ko jaate haiñ ghar-bār dekhnā