Tags-Dil

vo aa.e haiñ ḳhud apne dīvāne ko samjhāne
ai jazba-e-dil dekhā iqbāl mohabbat kā

ai chashm-e-haqīqat-bīñ dil kī hai bisāt itnī
ik chhoTā sā TukḌā hai ā.īna-e-hasrat kā

ai 'qadr' hasīnoñ ko maiñ dil se na kyuuñ chāhūñ
jab husn-parastī bhī ik zauq hai fitrat kā

tumhārī yaad merā dil ye donoñ chalte purze haiñ
jo in meñ se koī miTtā mujhe pahle miTā jaatā

vahm bhī ho jaatā hai dil ko lekin is meñ ta.ajjub kyā hai
aise dasht ki jin meñ sham.eñ aap hī aap jalīñ, milte haiñ

pūchhī jo us se maiñ dil-e-sad-chāk kī ḳhabar
uljhā ke apnī zulf vo shāne se uTh gayā

zabāñ hile na hile dil hile to kaam chale
ye zalzala ho to aa jaa.e guftugū merī

ye ek vādī-e-pur-ḳhār-e-ishq thī 'sāqib'
ulajh ke rah ga.ī har dil meñ guftugū merī

ek dil se dūsre dil tak safar karte rahe
rahguzār-e-shauq meñ ye hijrateñ achchhī lagīñ

dil kī duniyā hasratoñ ke dam se hī ābād hai
gaahe gaahe ham ko apnī hasrateñ achchhī lagīñ

haar banā in pārā-e-dil kā maañg na gajrā phūloñ kā
aur kahāñ se āshiq-e-muflis laa.e ye gahna phūloñ kā

kaash dil-e-sad-chāk ye ban kar bechne vaalā phūloñ kā
kū-e-butāñ meñ jā ke pukāre lo koī gajrā phūloñ kā

tum kahāñ vasl kahāñ vasl kī ummīd kahāñ
dil ke bahkāne ko ik baat banā rakhī hai

aql ko naaz thā had-bandi-e-ḳhair-o-shar par
dil ne jāñchā to har ik kaam adhūrā niklā

tishnagī maiñ ne bujhā lī ye hunar thā varna
ḳhizr kā dil bhī rah-e-umr meñ pyāsā niklā

afsāna mohabbat kā puurā ho to kaise ho
kuchh hai dil-e-qātil tak kuchh hai dil-e-bismil tak

kare āshiq pe vo bedād jitnā us kā jī chāhe
rakhe dil ko mire nāshād jitnā us kā jī chāhe

ye mazlūm-e-mohabbat dād-ras hargiz na pāvegā
kare dil-dād aur fariyād jitnā us kā jī chāhe

sadā-e-sāz jo bhātī hai do-ghaḌī dil kā
gumān tār-e-nafas pe hai chañg hone kā

dukh-bhare dil se dukh hī chhīn liye
aur jiinā vabāl kar Daalā