Tags-Dil

dil ko kyā dekhte ho ai dekhne vaalo
bāhar ḳhushkī aur andar gahrā paanī

jalva-hā-e-rañg-o-bū dil meñ kyā jagah paa.eñ
aañkh meñ jo bastā hai dil to us kī bastī hai

dil unheñ tarastā hai jab vo duur hote haiñ
jab qarīb aate haiñ aañkh unheñ tarastī hai

ham ne ishq-o-ulfat meñ vo fareb khaa.e haiñ
jin kī dil-farebī ko zindagī tarastī hai

dam naak meñ aayā hai ab is nauhagarī se
dil pak gayā ai aah tirī be-asarī se

jab chāho chale aao ye va.ada nahīñ achchhā
dil aañkh churātā hai bahut muntazarī se

ik din us ne mere dil ke darvāze par dastak dī thī
aur mire ḳhvāboñ kī duniyā meñ armānoñ kā jashn huā thā

dil yahī chāhtā thā 'shanāvar' sitāroñ kā muñh noch luuñ!
shahr ko maiñ ne dekhā thā ik raat masjid ke mīnār se

vādi-e-dil meñ ka.ī rātoñ se sannāTā hai
kaash bijlī hī tire abr-e-sitam se gir jaa.e

ye samajh lo ki rag-e-jāñ meñ hai zahrāb-e-junūñ
jab nigāh-e-karam-o-lutf se bhī dil dukh jaa.e

zaḳhm-e-sar ke dīvāne zaḳhm-e-dil kā qaa.il ho
zindagī sañvartī hai dil pe choT khāne se

hasrateñ rotī raheñ dil meñ mujāvir kī tarah
dil magar chup hī rahā lauh-e-maqābir kī tarah

har harf meñ saḳhtī hai tire sañg-e-jafā se
Dartā huuñ na phir shīsha-e-dil chuur ho ai shaiḳh

dil musalsal hī zaḳhm khātā hai
is kī miTTī meñ kuchh kamī hogī

dil-e-āgāh pashemāñ hai ye ma.alūm huā
ilm ḳhud jahl kā irfāñ hai ye ma.alūm huā

ham ne ābādī-e-ālam pe nazar jab Daalī
dil kī duniyā abhī vīrāñ hai ye ma.alūm huā

ābiyārī jo kare ḳhūn-e-rag-e-jāñ to 'sabā'
dil-e-har-zarra gulistāñ hai ye ma.alūm huā

jo jahāñ ke aa.ina haiñ dil unhoñ ke saada haiñ
dil meñ jā dene ko vo har ek ke āmāda haiñ

kal jahāñ se ki uThā laa.e the ahbāb mujhe
le chalā aaj vahīñ phir dil-e-be-tāb mujhe

dil se umañg lab se duā chhīn lī ga.ī
kahne ko qaidiyoñ ko rihā kar diyā gayā