Tags-Dil

ab bhī bharā nahīñ hai tumhārā jī to kar lo aur sitam
dil to baaz nahīñ aane vaalā hai aise satāne se

aaj yuuñ dil ne bahā.e aañsū
aañkh se ashk na bāhar aayā

hazār lutf-o-ināyat ba-pā.emālī-e-dil
milā hai husn-e-ḳhudā-dād ko qarīna bhī

vā.e-āshiq-e-nādāñ kā.enāt ye terī
ik shikasta shīshe ko dil banā.e baiThā hai

vaqf-e-hirmān-o-yās rahtā hai
dil hai akasr udaas rahtā hai

chale aao ki ab tanhā.iyāñ jiine nahīñ detīñ
tumheñ ujḌe hue dil kā ye sūnā-pan bulātā hai

'anjum' nirālā chor hameñ raah meñ milā
jo dil ke saath ham se duā.eñ bhī le gayā

gunāh kyā hai jo dil se aziiz rakhte haiñ
bane ho yūsuf-e-sānī to chaah karte haiñ

tah-e-ḳhāk bhī dil-e-mubtalā ko kabhī qarār na aa.egā
huuñ abhī se hashr kā muntazir ki naved jalva-e-ām hai

koī hausla hai na mudda.ā koī aarzū hai na iltijā
mire dil meñ ik tirī yaad hai mire lab pe ik tirā naam hai

tū sharāb de ki na de magar mire dil ko toḌ na sāqiyā
ki ġharīb bāda-parast kā yahī shīsha hai yahī jaam hai

mohabbat se bharā hai dil kā dariyā
magar pāyāb likhnā chāhtā huuñ

dil ne Thokar khā ke samjhā hadisā kyā chiiz hai
ġham kise kahte haiñ dard-e-lā-davā kyā chiiz hai

is ke ma.anī ḳhud-pasandī ke sivā kuchh bhī nahīñ
dil meñ paiham ḳhvāhish-e-dād-e-vafā kyā chiiz hai

vābasta is se saikḌoñ dil āshiqoñ ke haiñ
band-e-qabā na bāñdhiye zinhār khīñch kar

na kyuuñ taklīf ho armāñ ko dil meñ
kahāñ jaa.e kidhar jaa.e hai ghar band

kaheñ bhūle se koī aa to jaa.e
ham apne dil meñ rakkheñge nazar band

mirā dil bhī tilismī hai ḳhazāna
ki is meñ ḳhair bhī hai aur shar band

hikāyat-e-dil-e-dard-āshnā sunā.ūñgā
tirī nazar se mujhe jur.at-e-bayāñ to mile

dil meñ kuchh hai bayān meñ kuchh hai
aap kī dāstān meñ kuchh hai