Tags-Dil

us ko na.e safar meñ na.e ham-safar ke saath
dil ḳhush huā hai kyoñ ye ziyā dekhte hue

is añdhere meñ kahīñ hogā ujālā kuchh to
maiñ ne dil apnā jalāyā to mujhe yaad aayā

be-sabātī hī haqīqat hai jahāñ meñ yaaro
dil kā bhī zaḳhm bhar aayā to mujhe yaad aayā

dil se kuchh us kā ta.alluq nahīñ rasman mujh ko
duur tak chhoḌne aayā to mujhe yaad aayā

is qadar thā sañg-dil jaise kisī qātil kā dil
mujh se vo māhaul ai 'ḳhālid' na apnāyā gayā

mujhe nahīñ hai zarūrat ye aish-o-ishrat ab
taḌap rahā hai ye dil bas tirī adā ke liye

dil hai chup bol rahā ho jaise
ḳhud meñ ġham ghol rahā ho jaise

dil ko ab muft liye phirtā huuñ
pahle anmol rahā ho jaise

aañkh se hijr girā dil ne duhā.ī dī hai
ishq vāloñ kī kahāñ chīḳh sunā.ī dī hai

hai ye dil nāseh butāñ kā jalva-gāh is se na bol
toḌ mat sañg-e-jafā se is parī-ḳhāne ke ta.iiñ

lā.iye mai kartī hai ta.amīr dil-hā-e-ḳharāb
tā-abad rakhiyo ḳhudā ma.amūr maiḳhāne ke ta.iiñ

umr bhar dil ko ḳhayāl-e-gesū-e-pechāñ rahā
dhyān is nādān ne hargiz na chhoḌā saañp kā

shab-e-firāq na kaaTe kaTe kabhī 'muztar'
ḳhayāl-e-dost agar ġham meñ dil-navāz na ho

taklīf-e-qaid-e-zulf mire dil se pūchhiye
ḳhāliq kahīñ phañsā.en na machhlī ko jaal meñ

jī chāhā jahāñ par ro diyā hai paañv meñ chubhe aur TuuT ga.e
ḳhāroñ ne bhī dil meñ soch liyā hai kaun yahāñ dīvāne kā

har sub.h ko aah sar se dil-e-shādāb jarāhat rahtā hai
gar yuuñ hī rahegī bād-e-sahar ye phuul nahīñ murjhāne kā

karo koshish bhale hī laakh TuuTe dil bachāne kī
magar mausam vahī aa jaa.e to har ġham ukhaḌtā hai

dil kī har baat dhyān meñ guzrī
saarī hastī gumān meñ guzrī

jo thī dil-tā.eroñ kī mohlat-e-būd
tā zamīñ vo uḌaan meñ guzrī

zavāl-e-zāt to 'parvāz' sab kī qismat hai
yaqīn-e-dil ko magar be-sabāt mat karnā