kam nahīñ ham būjhte ka.abe se maiḳhāne ke ta.iiñ
sajda ham karte haiñ juuñ mehrāb paimāne ke ta.iiñ
hai ye dil nāseh butāñ kā jalva-gāh is se na bol
toḌ mat sañg-e-jafā se is parī-ḳhāne ke ta.iiñ
hijr meñ jiine se behtar hai halāk-e-roz-e-vasl
ye tarah kyā ḳhuub raas aa.ī hai parvāne ke ta.iiñ
lā.iye mai kartī hai ta.amīr dil-hā-e-ḳharāb
tā-abad rakhiyo ḳhudā ma.amūr maiḳhāne ke ta.iiñ
uTh gayā kahte haiñ dīvāna 'yaqīn' duniyā se haa.e
un ne kyā ābād kar rakkhā thā vīrāne ke ta.iiñ