Tags-Dil

ye dil ke zaḳhm chhupā kar jo muskurāte haiñ
to mere dost ye āsān thoḌī hotā hai

tirī vafā meñ kamī kuchh to aa.ī hai ki ye dil
bilā-javāz pareshān thoḌī hotā hai

bas itnā bol rahī chāragar kī ḳhāmoshī
balā kā dard dil-e-nā-tavāñ se guzrā hai

mere hī dil kī dhaḌkaneñ hoñgī
tum mire paas se kahāñ guzre

kitne ḳhāmosh hādse 'jāved'
dil hī dil meñ nihāñ nihāñ guzre

ham dil ko liye har des phire is jins ke gāhak mil na sake
ai banjāro ham log chale ham ko to ḳhasārā hotā hai

bulbul kī ḳhush-navā.ī kā baa.is hai ishq-e-gul
dil meñ jo dard hai to maza bhī suḳhan meñ hai

dil ke reshoñ se ridā-e-nūr bunte miT ga.e
shab kī fasloñ meñ nahīñ āsāñ ujāle shahr meñ

hai merī sādgī meñ husn aisā
tire dil meñ utarnā jāntī huuñ

tire dil par jo apnā haath rakh duuñ
maiñ terā dil badalnā jāntī huuñ

khule pinjre meñ bhī jis ko hai vahshat
ye dil aisā parinda kar liyā hai

tumhāre husn kī jis dil ko raushnī na mile
ham aise dil ko charāġh-e-mazār kahte haiñ

tirī nigāh-e-taġhāful se dil ne paayā hai
vo ek kaif jise intizār kahte haiñ

dil hai apnā na ab jigar apnā
kar ga.ī kaam vo nazar apnā

ab to donoñ kī ek hālat hai
dil sambhālūñ ki maiñ jigar apnā

maiñ huuñ go be-ḳhabar zamāne se
dil hai pahlū meñ bā-ḳhabar apnā

dil meñ aa.e the sair karne ko
rah paḌe vo samajh ke ghar apnā

chehre pe saare shahr ke gard-e-malāl hai
jo dil kā haal hai vahī dillī kā haal hai

daad de varna abhī jaan pe khelūñ huuñ maiñ
dil jalānā nahīñ dekhā kisī fariyādī kā

dasht-e-ulfat hai garche duur vale
dil se kahtā huuñ ye rahā aage