Tags-Dil

bhar aatā hai dil-e-mahrūm-e-pursish dard-mandī se
kahīñ bhī jab kisī dard-āshnā kī baat hotī hai

koī chehra khilā nahīñ lagtā
dil meñ shāyad ḳhushī nahīñ hogī

dil par se tire ġham kā abhī abr chhaTā hai
chamkā hai tirī yaad kā mahtāb ġhazal meñ

tum ne ik umr mire dil pe hukūmat kī hai
tum ko pal bhar meñ bhulāyā to nahīñ jā saktā

duur baḌhtā hī gayā hasrat-e-nākām ke saath
dil meñ ik Tiis uThī aap ke hañgām ke saath

aap ne pursish-e-ġham kā bhī takalluf na kiyā
dil meñ ham jalte rahe hasrat-e-nākām ke saath

daur-e-mai ḳhatm huā sham.a kā dil baiTh gayā
raunaq-e-bazm ga.ī sāqī-e-gulfām ke saath

ye ahd tum se agar ho sake to kar lenā
hamāre ba.ad kisī kā na dil dikhāoge

dil-e-tanhā meñ ab ehsās-e-mahrūmī nahīñ shāyad
tirī duurī bhī ab dil ke liye duurī nahīñ shāyad

burā kahnā bhī merā ḳhush na aayā us ko to varna
tasallī ye dil-e-nāshād hotā ek gaalī meñ

ḳharābī ishq se rahtī hai dil par aur nahīñ rahtā
nihāyat aib hai ye is dayār-e-ġham ke vaalī meñ

nigāh-e-chashm pur-ḳhashm-e-butāñ par mat nazar rakhnā
milā hai zahar ai dil is sharāb-e-portugalī meñ

sharāb-e-ḳhūn bin taḌpūñ se dil labrez rahtā hai
bhare haiñ sañg-reze maiñ nai is mīnā-e-ḳhālī meñ

aap hī ne dard-e-dil baḳhshā hameñ
aap hī is kā mudāvā kījiye

na kisī kī aañkh kā nuur huuñ na kisī ke dil kā qarār huuñ
kasī kaam meñ jo na aa sake maiñ vo ek musht-e-ġhubār huuñ

sar khā liyā hai dil ne mirā bol bol kar
kahtā huuñ maiñ jahāñ pe vahāñ boltā nahīñ

dil meñ utartā jaatā hai us kā kahā huā
chāhe vo shaḳhs merī zabāñ boltā nahīñ

ahl-e-dānish hue arbāb-e-siyāsat ke murīd
aisī pastī pe mire dil meñ chhurī lagtī hai

yahī chamakte hue pal dhuāñ dhuāñ hoñge
yahī chamaktā huā dil bujhā bujhā hogā

sarāpā pyaar haiñ ham to vafā-parast bhī haiñ
ham aise shaḳhs ke dil meñ kudūrateñ kaisī