Tags-Dil

tum agar chāho to har sher shagufta ho jaa.e
bas mire dil meñ utar jaao ġhazal hone tak

merī jānib se ijāzat hai chale jaao magar
dil ba-zid hai to Thahar jaao ġhazal hone tak

merī āñkhoñ se mire dil meñ pahuñch kar tum bhī
dil kī dhaḌkan meñ utar jaao ġhazal hone tak

kam-az-kam ḳhāk-o-ḳhūñ kī gum-shuda kaḌiyāñ hī mil jātīñ
sar-e-duniyā ye dil itnā to dar-andāz ho saktā

mohabbat jurm hai kis ne kahā hai
batā do sab ko maiñ dil meñ agar huuñ

kyā huā ham pe jo is bazm meñ ilzām rahe
sāhib-e-dil to jahāñ bhī rahe badnām rahe

koī taqrīb to ho dil ke bahalne ke liye
tū nahīñ hai to tirā zikr tirā naam rahe

is dil kī harī shāḳh pe jo phuul khile the
lamhoñ kī hathelī pe vo murjhā ke gire haiñ

dīda-o-dil kī tabāhī mujhe manzūr magar
un kā utrā huā chehra nahīñ dekhā jaatā

ab to jhūTī bhī tasallī ba-sar-o-chashm qubūl
dil kā rah rah ke taḌapnā nahīñ dekhā jaatā

muskurā.e vo hāl-e-dil sun kar
aur goyā javāb thā hī nahīñ

markaz-e-husn-o-mohabbat matl.a-e-mehr-o-vafā
dil ke ā.īne meñ ik tasvīr honī chāhiye

ārzū-e-dil-e-nākām se Dar lagtā hai
zindagānī tire paiġhām se Dar lagtā hai

shīsha-e-dil pe koī Thes na lagne paa.e
talḳhi-e-mai se nahīñ jaam se Dar lagtā hai

dekh kar qasr-e-tamannā kī tabāhī shāyad
gulshan-e-dil ke dar-o-bām se Dar lagtā hai

na hai 'shā.ir' ab ġham-e-nau-ba-nau na vo dāġh-e-dil na vo tāzgī
jinheñ e'timād-e-bahār thā vahī phuul rañg badal ga.e

ḳhud apnī baat kā dukh ban ke rah na jā ai 'talḳh'
har ek dil meñ samā jā ġham-e-jahāñ ban kar

jidhar ke ho udhar ke ho raho dil se to behtar hai
ki loTā be-talī kā ho to ToñTī TuuT jaatī hai

dil kī mehrāb meñ ik sham.a jalī thī sar-e-shām
sub.h-dam mātam-e-arbāb-e-vafā hotā hai

ek hameñ āvāra kahnā koī baḌā ilzām nahīñ
duniyā vaale dil vāloñ ko aur bahut kuchh kahte haiñ