Tags-Dil

mhv-e-parvāz hai ye dil aur maiñ
jaañ chhiḌaktā huuñ is kabūtar par

tire kūcha-e-zulf meñ dil hai mirā ab use maiñ samajhtā huuñ dām-e-balā
ye ajiib sitam hai ajiib jafā ki yahāñ na rahe to kahīñ na rahe

is tarah aatī hai dil meñ un kī yaad
duur par jaise paḌīñ parchhā.iyāñ

mujh ko is nīm-jāñ dil pe hairat hai jo
zindagī chāhtā hai ḳhatā ke liye

āfateñ jis qadar ho sakīñ baḳhsh do
vaqf hai dil mirā har balā ke liye

naql-e-fariyād se merī kyā fā.eda
kuchh asar bhī ho dil kī sadā ke liye

'shauq' un ke sitam kī latāfat na pūchh
dil taḌaptā hai ab tak jafā ke liye

lākhoñ meñ intiḳhāb ke qābil banā diyā
jis dil ko tum ne dekh liyā dil banā diyā

jaañ bhī ho dil ho jumbish-e-a.azā
buud ho kal mirī baqā ho tum

bartan bartan chīḳh rahī thī kaun samajhtā us kī baat
dil kā bartan ḳhālī thā us bartan bechne vaalī kā

samundar kā tamavvuj abr-o-bārāñ
zamīñ ke dil meñ phir bhī tishnagī hai

maiñ 'nayyar' kyā dikhā.ūñ zaḳhm dil kā
kisī kī aañkh ḳhud nam ho ga.ī hai

ujḌā huā vo bāġh-e-jahāñ ham judā hue
āseb-e-ġham kā dil pe baserā vahīñ se hai

le lījiye mirā dil-e-sad-chāk muft hai
shāna barā.e-zulf-e-pareshāñ ḳharīdiye

hotā hai shauq-e-ishq meñ rah rah ke valvala
majnūñ se dāġh-e-dil sar-e-maidāñ ḳharīdiye

sun legā terī chaap to dhaḌkegā der tak
laakh apne gird-o-pesh se dil be-ḳhabar bhī ho

sustā.e jis ke saa.e meñ har aarzū mirī
is dil ke sahn meñ koī aisā shajar bhī ho

sikka apnā nahīñ jamtā hai tumhāre dil par
naqsh aġhyār ke kis taur se jam jaate haiñ

hind ke ḳhāk-basar 'sāqī' haiñ ahl-e-bātin
ka.aba-e-dil meñ pa.e-tauf-e-haram jaate haiñ

maiñ bhī rasman salām kartā huuñ
dil se vo bhī duā nahīñ dete