Tags-Dil

dil ke zaḳhmoñ meñ tujhe de ke jagah ham dil ko
vahshat-o-chain kā sañgam nahīñ karne vaale

ai dil-e-'zoyā' tujhe marne kī jaldī hai to jā
ham tirī maut kā mātam nahīñ karne vaale

koī bhūlā huā naġhma huuñ dil kā
vafā ke āñsuoñ meñ Dhal rahā huuñ

dāstān-e-dard-e-dil ahl-e-vafā kahne lage
ya.anī har āvāz ko terī sadā kahne lage

apne-āp ko samjhāte haiñ raat Dhalī ab tū bhī so jā
ham hī akele kaise so.eñ dil kī dhaḌkan jaag rahī hai

asar ke pīchhe dil-e-hazīñ ne nishān chhoḌā na phir kahīñ kā
ga.e haiñ naale jo sū-e-gardūñ to ashk ne ruḳh kiyā zamīñ kā

maiñ bhī huuñ be-qarār aa jaao
tum bhī ho dil-figār aa jaao

maiñ tumhārī karūñgā dil-jūī
tum ho kyuuñ ashk-bār aa jaao

tan ke māmūre meñ yahī dil-o-chashm
ghar the do so ḳharāb haiñ donoñ

kār-e-farhād se ye kam to nahīñ jo ham ne
aañkh se dil kī taraf moḌ diyā paanī ko

tū ruke yā na ruke faisla tujh par chhoḌā
dil ne dar khol diye haiñ tirī āsānī ko

dil meñ kaahe na chor ghar karte
dar bhī vā koī koī hotā hai

bhiiḌ hai bar-sar-e-bāzār kahīñ aur chaleñ
aa mire dil mire ġham-ḳhvār kahīñ aur chaleñ

ye jo phūloñ se bharā shahr huā kartā thā
us ke manzar haiñ dil-āzār kahīñ aur chaleñ

vo jis se milne kī dil meñ taḌap ziyāda hai
hamārā us se ta.āruf bhī ġhā.ebāna huā

vo terī bazm se bāzār ho ki gulshan ho
kahāñ kahāñ na mirā dil tirā nishāna huā

dil kī baat kahne kā ik yahī tarīqa hai
chhup ke saarī duniyā se ab gharoñ ke konoñ meñ

yūñhī to dil-āvez nahīñ sher-e-'tabassum'
ye naqsh tire husn ke sāñche meñ Dhale haiñ

ai yaas mirā ghar tirā maskan to nahīñ hai
dil hai ye tamannāoñ kā madfan to nahīñ hai

taklīf asīrī kī shikāyat na kar ai dil
ye kunj-e-qafas kunj-e-nasheman to nahīñ hai