Tags-Dil

dil chiiz hai kyā jaan bhī duuñ ishq meñ 'sābir'
maiñ naf.a samajhtā huuñ mudām aise zarar ko

maiñ dil meñ bulā kar tujhe ruḳhsat na karūñgā
mushkil hai tirā lauT ke jaanā mire ghar se

bayābāñ sabza-e-nau-ḳhez se ābād hote haiñ
sakhī tum bhī jo dil apnā basā letīñ to kyā hotā

ye nirmal jal kā chashma ye dil-e-be-qaid-o-be-pāyāñ
use bhī samt miltī us kī bhī ik rahguzar hotī

kyā batlā.ūñ tum ko tum tak arz guzārne meñ
dil ne apne aap se kitnī khīñchā-tānī kī

maqdūr kyā mujhe ki kahūñ vaañ ki yaañ rahe
haiñ chashm-o-dil ghar us ke jahāñ chāhe vaañ rahe

aa.e to ho pa dil ko tasallī ho tab mire
itnā kaho ki aaj na jāveñge haañ rahe

'bedār' zulf khīñche idhar chashm-e-yār udhar
hairāñ hai dil kahāñ na rahe kis ke haañ rahe

usī ke gaañv kī rāhoñ meñ baiTh kar har roz
maiñ dil kā haal havā ko sunā diyā kartā

is tarah duniyā meñ dil ko mahram-e-ġham kījiye
jab ḳhushī koī mayassar ho to mātam kījiye

ġham ko hone dījiye ho jis qadar mānūs dil
dil ko jitnā ho sake begāna-e-ġham kījiye

vo dushmanī kī shaan se mile to dil meñ rah ga.e
magar ye baat dostī kī ān-bān meñ nahīñ

tire josh-e-karam se Dar rahā huuñ
dil-e-dard-āshnā itrā na jaa.e

kahāñ tum dard-e-dil le kar chale 'najm'
mizāj-e-dard-e-dil pūchhā na jaa.e

dil-o-dīda par kyā ijāra hamārā
na sahrā hamārā na dariyā hamārā

mohabbat nibhe but ki ho ḳhāna-e-dil
hamārā tumhārā tumhārā hamārā

bas ek rañg hai dil meñ kisī ke hone se
ab apne-āp ko is se bhī saada kyā karnā

pheñktā rahtā hai patthar kaun dil kī jhiil meñ
dā.era-dar-dā.era kyuuñ phailtā rahtā huuñ maiñ

dil jo dukhtā hai 'ziyā' aañkh bhī bhar aatī hai
log fitrat ke taqāzoñ ko chhupā.eñ kaise

kabhī ban ke ishq kī rāz-dāñ kabhī ho ke aah kī dāstāñ
ka.ī tarah tere huzūr tak mire hāl-e-dil kī ḳhabar ga.ī