Tags-Dil

mansab-o-jāh haqīqat meñ haiñ mohtājī-e-dil
sochiye ḳhuub ye kyā ilm-o-hunar chāhte haiñ

na muḌ kar tū ne dekhā aur na maiñ taḌpā na ḳhanjar
na dil hovegā terā sā na merā sā jigar hogā

dil kī māyūs tamannāoñ ko mar jaane do
dard ko āḳhirī manzil se guzar jaane do

us ne maanī na kabhī tīrgī-e-shab se shikast
dil añdheroñ meñ rahā us kā farozāñ yaaro

dil ye kyā jaane ki kyā shai hai harārat ḳhuun kī
jism kyā samjhe ki kaisī zindagī kī lahr hai

shikast-o-fat.h kā zimma nahīñ dil-e-nādāñ
laḌe hazār meñ ye kaam hai sipāhī kā

jo kuchh apne dil par guzrī kuchh na kaho to behtar hai
hañs hañs kar hī 'ārif' us kī baat suno to behtar hai

sun lo dil ke saude meñ ab jhuuT bhī kaam na aa.egā
ūbaḌ-khābaḌ raste par ab saath chalo to behtar hai

hameñ gulzār-e-jannat hai azīzo bāġh-e-dil apnā
samajhte ho ki jāñ-parvar hai sehn-e-gulistāñ hogā

taġhāful aur sitam ke badle hai andāz dildārī
sambhal ai shauq-e-be-pāyāñ tirā ab imtihāñ hogā

log kahte haiñ yaar aatā hai
dil tujhe e'tibār aatā hai

saañs kī lai pe dhaḌaktā hai tumheñ dekh ke dil
dil ko dekhā hai ka.ī baar hī raqsāñ ham ne

mundamil zaḳhm hue the na hamāre dil ke
phir na.e ġham ko kiyā aaj hī mehmāñ ham ne

ham haiñ be-dil dil apne paas nahīñ
aah is kā bhī tujh ko paas nahīñ

maanā ki hai farār magar dil ko kyā kareñ
maazī kī yaad hī meñ hameñ Dūbnā paḌā

maanā ye ki dil hai us kā patthar
patthar meñ nihāñ sharar bhī hogā

yuuñ bujhā hai ki dil ye chāhtā hai
aur ik martaba charāġh jale

aise jaltā hai aaj dil merā
jis tarah 'mīr' kā charāġh jale

paḌte hī ik nazar huā zaḳhmī dil-o-jigar
qātil tirī nazar hai ki ḳhanjar khulā huā

qāsid se kyā kahūñ maiñ likhūñ ḳhat meñ un ko kyā
pinhāñ ke dil kā haal hai un par khulā huā