Tags-Dil

fikr-e-nāla meñ goyā halqa huuñ ze-sar-tā-pā
uzv uzv juuñ zanjīr yak-dil-e-sadā paayā

jis qadar jigar ḳhuuñ ho kūcha dādan-e-gul hai
zaḳhm-e-teġh-e-qātil ko turfa dil-kushā paayā

sabza kahtā hai luuTe jaao mujhe
dil kushāda hai merā miTTī se

gayā hai kūcha-e-kākul meñ ab dil
musalmāñ vārid-e-hindostāñ hai

jis ke dil meñ hariyālī sī hotī hai
sab ke sar kā bojh vahī to Dhotā hai

dil-soz nahīñ ahl-e-chaman ātish-e-gul se
ai bād-e-sabā maiñ yūñhī dīvāna banā huuñ

raushan harm-e-jāñ meñ hai ik sham-e-tamannā
dil pahle jalāyā hai to parvāna banā huuñ

maiñ us ke lafz lafz kī banāvaToñ meñ gum thā jab havā chalī
jo mere dil kī mez par kitāb thī khulī huī kidhar ga.ī

jhuuT kahūñ to dil tayyār nahīñ hotā
sach se lekin beḌā paar nahīñ hotā

merī tarah ye dil ke lahū meñ nahā.e haiñ
be-vaj.h to nahīñ hai gulāboñ kā rañg ye

dil kahtā hai vo kuchh bhī ho us kī yaad jagā.e rakh
aql ye kahtī hai ki tavahhum par jiinā nādānī hai

tere pyaar se pahle kab thā dil meñ aisā soz-o-gudāz
tujh se pyaar kiyā to ham ne apnī qīmat jaanī hai

jism kī chaukhaT pe ḳham dil kī jabīñ kar dī ga.ī
āsmāñ kī chiiz kyuuñ sarf-e-zamīñ kar dī ga.ī

khoT sone ke tasalsul meñ kahīñ aa.ī zarūr
yuuñ abas to sa.ī-e-dil bātil nahīñ kar dī ga.ī

naqsh āḳhir dil se us rū-e-hasīñ kā miT gayā
ḳhatm āḳhir sohbat-e-nām-o-nagīñ kar dī ga.ī

kaise kaise sitam hue tujh par
kyuuñ mire dil tujhe ḳhabar na huī

dil ne duniyā na.ī banā Daalī
aur hameñ aaj tak ḳhabar na huī

zabāñ pe harf-e-tamannā na aa.e kyā parvā
simaT ke aa ga.e nazroñ meñ dil ke vīrāne

saudā-e-gesū-e-siyah-e-yār ho gayā
āzād thā jo dil so giraftār ho gayā

dil ko qarār hai na to jaañ ko qarār hai
ye ishq hai ilāhī ki āzār ho gayā