Tags-Dil

mujh se dekhī nahīñ jaatī koī jaatī huī chiiz
tire uThte hī mire dil meñ jo Dar baiThā hai

jo dekhī us kī vo teġh-e-abrū to jī ko haibat ne aan gherā
nigah jo kākul ke daam par kī to dil ko is kā shikār dekhā

hinā jo hāthoñ meñ us ke dekhī to rañg dil kā huā ajab kuchh
kamar bhī dekhī to aisī nāzuk ki ho bhī is par nisār dekhā

lillāhil-hamd ki dil shola-fishāñ hai ab tak
piir hai jism magar tab.a javāñ hai ab tak

kab se huuñ munkir-e-gulbāñg-e-malā.ek phir bhī
dil pe jibrīl kī dastak kā gumāñ hai ab tak

dāġh-e-dil siine meñ aahoñ se numāyāñ karnā
ham se sīkhe shab-e-ġham koī charāġhāñ karnā

dil ke bahlāne kā vahshat meñ ye sāmāñ karnā
chashm-e-ḳhūñ-bār se dāman ko gulistāñ karnā

dāġh-e-dil parde meñ rah jaa.e na ai dast-e-junūñ
chaak kuchh aur abhī merā garebāñ karnā

dil ko ab bhī tirā junūñ hai 'asad'
aisī vahshat nahīñ ki tujh se kaheñ

ye dhaḌaktā huā dil us ke havāle kar duuñ
ek bhī shaḳhs agar shahr meñ zinda mil jaa.e

ai dil us zulf kī rakhiyo na tamannā baaqī
hashr tak varna rahegī shab-e-yaldā baaqī

jaan siine se nikalne ko hai dil pahlū se
hai faqat us nigah-e-nāz kā iimā baaqī

kis ko dekhā hai ki pindār-e-nazar ke bā-vasf
ek lamhe ke liye ruk ga.ī dil kī dhaḌkan

aisī suunī to kabhī shām-e-ġharībāñ bhī na thī
dil bujhe jaate haiñ ai tīrgī-e-sub.h-e-vatan

dil huuñ maiñ pyaar bharā aur tū nāzuk dhaḌkan
dil kā tujh se hai magar dard kā rishta mujh se

bazm yādoñ kī sajī gosha-e-dil meñ 'jāved'
phir vahī taaza ġhazal kā hai taqāzā mujh se

jaadū ġhazal kā jazb-e-tamannā ke ras meñ hai
ya.anī vo dil kī baat diloñ meñ jo dam ga.ī

rah gayā kam hī go safar baaqī
dil meñ ḳhvāhish kā hai guzar baaqī

kyā vo mujh se kabhī na bichhḌegā
kyā nahīñ dil meñ koī Dar baaqī

dil baiThne lage to nigāheñ bhī thak ga.iiñ
kab tak tirī taraf tire bīmār dekhte