Tags-Dil

udāsiyoñ ke sivā dil kī zindagī kyā hai
koī batā.e ki ḳhvāboñ kī barhamī kyā hai

ye ahl-e-dil ki uḌāte haiñ mere ġham kā mazāq
ye be-hisī jo nahīñ hai to be-hisī kyā hai

na pūchh mujh se jo kār-e-savāb meñ hai maza
ye pūchh mujh se gunāhoñ meñ dilkashī kyā hai

kitnā dard-āmez thā naġhma dil-e-nāshād kā
tiir tarkash meñ taḌap uTThā sitam ījād kā

dāstān-e-ālam-e-furqat kisī se kyā kaheñ
ho gayā barbād har zarra dil-e-nāshād kā

ai dil-e-nāshād mujh ko terī vahshat dekh kar
yaad aa jaatā hai qissa qais aur farhād kā

aa.e vo bahr-ayādat Daal kar ruḳh par naqāb
rah gayā armān dil meñ āshiq-e-nāshād kā

ham be-gharoñ ke dil meñ jagātī hai Dar galī
sotī hai aadhī raat ko jab be-ḳhabar galī

kuchh saal qabl mere bhī hisse meñ aa.ī thī
ik dil-nashīn shaam aur ik muntazar galī

sahmī sahmī huī rahtī haiñ makān-e-dil meñ
ārzūeñ bhī ġharīboñ kī tarah hotī haiñ

un laboñ kī yaad aa.ī gul ke muskurāne se
zaḳhm-e-dil ubhar aa.e phir bahār aane se

haal jo hamārā hai sab to un pe raushan hai
phir batā.ūñ kyā hogā hāl-e-dil sunāne se

dil meñ ik jaltā huā tiir utar jaatā hai
jab ghaḌī bhar meñ badal jaate haiñ tevar chehre

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

laḳht-e-dil ḳhaak meñ detā hai koī bhī rahne
gir paḌe ashk to āñkhoñ se uThā lījiyegā

baḌh chalā ishq to dil chhoḌ ke duniyā uTThā
ḳhud-baḳhud josh-e-mai-e-nāb se shīsha uTThā

dil meñ valvala sā kuchh chaal meñ anā sī kuchh
jaise ḳhud nikālā ho apnā rāsta maiñ ne

ābād sarāboñ se sadā is kā jahāñ thā
sahrā mire dil sā kabhī vīrāñ bhī nahīñ thā

ab to tum bhī javāñ hue ho dekheñge dil ko bachāoge tum
mil jo gayā ham-chashm koī phir aañkh usī se laḌāoge tum

ra.asha thī zabāñ meñ luknat paañv beḌī mohrā deñge
muñh se kuchh kā kuchh niklegā dil meñ jo Thahrāoge tum