Tags-Dil

'sultān' asīr-e-zulf hue bhī to kis ke aap
dil se bahut qarīb haiñ aur jism-o-jāñ se duur

maiñ kyā karūñ dimāġh ne taḳhta ulaT diyā
ab dil pe dost terī hukūmat nahīñ rahī

ye sānehe dil-e-ġham-ghīñ huā hī karte haiñ
na ishq hī kī ḳhatā hai na husn hī kā qusūr

ujāḌo mire dil ko yā phir basāo
mirī jaan is ghar ke muḳhtār tum ho

ḳhudā jāniye dil pe kyā guzre āḳhir
ye ahl-e-vafā hai sitamgār tum ho

bane is tabī.at se kyūñkar kisī kī
zarā jī meñ munsif to dildār tum ho

kabhī jo dekhte haiñ muskurā ke aap idhar
dil-o-nigāh meñ kyā kyā gumāñ guzarte haiñ

vo dil se tañg aa ke aaj mahfil meñ husn kī tamkanat kī ḳhātir
nazar bachānā bhī chāhte haiñ nazar milānā bhī chāhte haiñ

mazā jab aa.e ki intiqāman maiñ dil kā ā.īna toḌ Dālūñ
mire hī hāthoñ saje haiñ aur ab mujhī pe chhānā bhī chāhte haiñ

agarche tūfān-e-rañg-o-bū kī sharīr lahroñ se thak chuke haiñ
magar vo dil ke na.e talātum kī zad meñ aanā bhī chāhte haiñ

aks baT jaatā hai ā.īnoñ meñ lekin ai dil
aa.ina aks meñ baT kar nahīñ qaa.em rahtā

yaad meñ un kī ka.ī baar bikhar jaatā hai
dil bhī kyā hai ki simaT kar nahīñ qaa.em rahtā

dil vo bachcha ki isī pal meñ humaknā chāhe
ye vo lamha ki palaT kar nahīñ qaa.em rahtā

dil ke varaq-e-sāda pe kuchh rañg ubhāreñ
ḳhūñ-gashta tamannāoñ kī tasvīr utāreñ

kab tak dil-e-dīvāna ye be-vajah ta.āqub
ab haath kahāñ ā.eñgī ram-karda bahāreñ

kitāboñ meñ paḌhe jab ek-tarfa pyaar ke qisse
ḳhud apnā dil tamannāoñ kā maqtal kar diyā maiñ ne

dhuāñ yādoñ kā hī kaafī thā dil kamzor karne ko
jalā kar raakh kal biiḌī kā banDal kar diyā maiñ ne

nazar duzdīda terī kab nazar aatī hai āshiq ko
uḌā jaatā hai dil aur tiir kī āvāz aatī hai

jhukā.e sar na kyuuñ ḳhāmosh baiThūñ hijr-e-jānāñ meñ
ki dil ke TūTne kī kaan meñ āvāz aatī hai

bhalā aaj zinda āh-e-dil āshiq kare paidā
ki ḳhud vo kah rahe haiñ dard kī āvāz aatī hai