Tags-Dil

maiñ vahī huuñ dil vahī armāñ vahī
ek dhokā gardish-e-ayyām hai

dasht-e-ġhurbat meñ dil-e-vīrāñ ne
yaad jamunā ko ka.ī baar kiyā

qāmat-e-dilkash libās-e-surḳh meñ thī mehmāñ
mere ghar ik surḳh maḳhmal kī parī kal raat ko

kyuuñ log havā bāñdhte haiñ himmat-e-dil kī
ham ne to use gir ke sambhalte nahīñ dekhā

har-dam mire dil hī ko jalātī raheñ aaheñ
ghar ġhair kā lekin kabhī jalte nahīñ dekhā

ulfat meñ agar jaan nikal jaa.e to sach hai
dil se magar armān nikalte nahīñ dekhā

har ek ilāj-e-dil betāb hai be-sūd
is ko to kisī taur bahalte nahīñ dekhā

rabāb-e-husn hai yā koī sāz-e-ulfat hai
samajh meñ aa na sakī dil kī jo haqīqat hai

simaT ke aa ga.ī pahlū meñ kā.enāt-e-jahāñ
samajh meñ aa nahīñ saktī jo dil kī vus.at hai

dil hai ḳhāmosh jhiil kī sūrat
kañkarī pheñkiye ki ho halchal

shāyad kisī kī yaad kā mausam phir aa gayā
pahlū meñ dil kī tarah dhaḌakne lagī hai shaam

dil Thahrā ek tabassum par kuchh aur bahā ai jaan nahīñ
gar hañs diije aur le liije to fā.eda hai nuqsān nahīñ

dil phañs kar us kī zulfoñ meñ tadbīr rihā.ī kī mat kar
kab chhūTā us ke daam se tū vo daanā hai nādān nahīñ

kabhī dāmān-e-dil par dāġh-e-māyūsī nahīñ aayā
idhar va.ada kiyā us ne udhar dil ko yaqīñ aayā

mohabbat-āshnā dil maz.hab-o-millat ko kyā jaane
huī raushan jahāñ bhī sham-e-parvāna nahīñ aayā

do-ālam se guzar ke bhī dil-e-āshiq hai āvāra
abhī tak ye musāfir apnī manzil par nahīñ aayā

mirī jānib se un ke dil meñ kis shikve pe kiina hai
vo shikva jo zabāñ par kyā abhī dil meñ nahīñ aayā

kyā kyā fareb dil ko diye iztirāb meñ
un kī taraf se aap likhe ḳhat javāb meñ

kyūñ-kar dil-e-ġham-zada na fariyād kare
jab mulk ko charḳh-e-pīr barbād kare

tū mire āsmāñ kā taara hai
dil tirī rah kī dhuul ho jaise