Tags-Dil

vagarna TuuT ke kab kā bikhar gayā hotā
ḳhayāl-e-yār ne dil ko sambhāl rakkhā hai

kyā kare hāl-e-dil bayāñ koī
na rahā zeb-e-dāstāñ koī

dil bhī hamrāz-e-ārzū niklā
ab nahīñ apnā rāz-dāñ koī

chhoḌ dukh-sukh kī manziloñ kā tavāf
dil miyāñ DhūñD āstāñ koī

mere hālāt agar koī samajhnā chāhe
us ko ik baar mire dil meñ utarnā hogā

naqsh maazī ke miTā kar sabhī dil se apne
dard-o-ġham se hameñ ik baar ubharnā hogā

dil-figāroñ ke shahr meñ 'tābish'
ek bhī baḳhiya-gar nahīñ rahtā

ai dil tavālat-e-shab-e-furqat kā kyā gila
nādān farq bhī koī shām-o-sahar meñ hai

dil de chuke haiñ jaan bhī ab de ke dekh leñ
ik imtihān ye bhī hamārī nazar meñ hai

chhupā na gosha-nashīnī se rāz-e-dil 'vahshat'
ki jāntā hai zamāna mire suḳhan se mujhe

sālhā-sāl se vīrān haiñ dil kī galiyāñ
ek muddat se koī is taraf aayā hī nahīñ

pahuñche haiñ jab bhī ḳhalvat-e-dil meñ to ai nadīm
akasr ham apne-āp se bezār aa.e haiñ

gale lagā ke jo sunte the dil kī aahoñ ko
taras rahā huuñ unhīñ kī hasīn bāñhoñ ko

ham kisī sultāñ ke taabe nahīñ 'ābid-vadūd'
ham vo kahte haiñ jo apne dil pe hai guzrī huī

tū dilbar hai dil-dār hai tū tū jān-o-dil se pyārā hai
fitrat ne jis ko sañvārā hai tujhe husn sarāpā kahte haiñ

koī ishq kī tujh ko jaan kahe koī dil kā tujhe armān kahe
dil vāloñ kī is bastī meñ tujhe aur bhī kyā kyā kahte haiñ

majbūriyoñ ke naam pe sab chhoḌnā paḌā
dil toḌnā kaThin thā magar toḌnā paḌā

dekh kar chashm ḳhūn-e-dil ronā
kahīñ ifshā na ho kisī kā raaz

kyuuñ na badnām huuñ jahāñ meñ maiñ
dil hai bad-ḳhvāh chashm hai ġhammāz

ek dil ke liye ye fauj-kashī
ishva-o-nāz ġhamza-o-andāz