Tags-Dil

dil-o-dimāġh meñ rishta nahīñ jahāñ koī
ik aise jism meñ jiinā hamārī qismat hai

zid aur ye zid ai dil achchhā to ḳhudā-hāfiz
qurbān hī us but par hotā hai to jā ho jā

har qāfla-e-dil ko tū muzhda-e-manzil de
har rahguzar-e-ġham meñ naqsh-e-kaf-e-pā ho jā

lagā.eñ aag hī dil meñ ki kuchh ujālā ho
kisī bahāne to is ghar kā bol-bālā ho

kis se ummīd kareñ koī ilāj-e-dil kī
chārāgar bhī to bahut dard kā maarā niklā

dil pe kyā jaane guzar jaatī hai kyā pichhle-pahar
os Tapkī to kahīñ sub.h kā taara niklā

dast-e-chālāk junūñ siina ko bhī kar de chaak
tā kahīñ pahlū se mere dil-e-nālāñ nikle

gulshan-e-dil meñ bhī thī apnī kuchh ulTī tāsīr
tuḳhm-e-ummīd jo bo.e gul-e-hirmāñ nikle

jis kuuñ tujh ġham siiñ dil-shigāfī hai
marham-e-vasl us kuuñ shāfī hai

kab kahā ātish-e-furqat se jalāyā tū ne
haiñ mire nāla-e-dil sā.iqa-bār aap se aap

zulf ko chhū ke paḌā hai jo balā meñ ai dil
kaaT khātā hai kisī ko koī maar aap se aap

kuchh tirī teġh-e-jafā kī nahīñ taqsīr ai gul
sūrat-e-ġhuncha mirā dil hai figār aap se aap

mire dil meñ jo thī vo baat ab to
mire hoñToñ pe jaarī ho ga.ī hai

ka.ī din se ye kaisī be-ḳhudī sī
dil-e-muztar pe taarī ho ga.ī hai

jab tire paañv kī aahaT mirī jānib aa.ī
sar se pā tak mujhe us vaqt lagā dil huā maiñ

me.arāj hai me.arāj tire zauq-e-nazar kī
har manzar-e-dil-kash yahī kahtā hai udhar dekh

dil-e-vahshī tū na kar ishq pareshāñ hogā
misl ā.īna ke phir shashdar-o-hairāñ hogā

sarsabz ho ke dil-nashīñ ban jaatī ye zamīñ
aisā gudāz sail-e-ravāñ kyuuñ nahīñ huā

naġhmoñ ke darmiyān fasāna thā pur-kashish
dilkash fazā meñ raqs javāñ kyuuñ nahīñ huā

zabān bigḌī hai aap hī kī hamārā nuqsān kyā hai is meñ
zarā tumhīñ pūchhūñ dil se apne bhalā ye tarz-e-maqāl kyā hai