Tags-Dil

chhup rahā hai qafas-e-tan meñ jo har tā.ir-e-dil
aañkh khole hue shāhīn-e-nazar kis kā hai

said karne se jo hai tā.ir-e-dil ke munkir
ai kamāñ-dār tire tiir meñ par kis kā hai

zamīñ ko khīñch ke maiñ sū-e-asmāñ le jā.ūñ
ye dil kā dard hai is dard ko kahāñ le jā.ūñ

ye dil ajiib sī ik kashmakash se hai do-chār
natīja ek sā hogā ise jahāñ le jā.ūñ

laag kuchh aag nahīñ thī jo lagā dī tū ne
dil koī ghar to nahīñ thā jo jalā baiThā hai

koī jā ke mere masīhā se kah de ḳhudā ke liye aag dil kī bujhā de
mohabbat ke sho.ale bhaḌakne lage haiñ kahīñ ḳhirman-e-zindagī jal na jaa.e

sunā.e kise apnī ġham kī kahānī kidhar jaa.e vo terī mahfil se uTh kar
nazar ne tirī jis kā dil le liyā ho vo qismat kā maarā kahāñ chain paa.e

na saaqī na botal na hai raqs-e-sāġhar udāsī hai chhā.ī huī anjuman par
fanā-sāzoñ dil se ġhazal aisī chheḌo 'fanā' naach uThe zindagī jhuum jaa.e

rok letī jo parinde ko qafas meñ ai 'atīq'
aarzū aisī na koī bhī dil-e-muztar meñ thī

hayāt dil kī jo ik shab shumār kar bhī luuñ
vo ek shab hī bahut be-qarār guzrī hai

uḌā ke le jo ga.ī dil kī siskiyāñ bulbul
chaman chaman pe qayāmat hazār guzrī hai

ye kis maqām pe pahuñchī hai justujū dil kī
visāl rut thī magar sogvār guzrī hai

dil-e-betāb kā payām liyā
phir kisī ne mirā salām liyā

Dagmagāte hue mire dil ko
us hasīñ ajnabī ne thaam liyā

ḳhushī sī miltī hai ḳhud ko aziyyateñ de kar
so jān-būjh ke dil ko niDhāl rakhte haiñ

ik parī-chehra ki jis chehre se ā.īna banā
dil ki ā.īna-dar-ā.īna parī-ḳhāna banā

ek jhoñkā tire pahlū kā mahaktī huī yaad
ek lamha tirī dildārī kā kyā kyā na banā

Thahar saktā nahīñ siine meñ jab dil muztarib ho kar
sukūñ ban kar mire pahlū meñ jaane kaun aatā hai

kuchal detī hai jab ehsās ko sanjīdgī ġham kī
sharārat se mirā dil gudgudāne kaun aatā hai

shab-e-ġham dil pe chhā jaatā hai jab ik huzn-e-be-ḳhvābī
nashāt-e-rūh ban ban kar sulāne kaun aatā hai