Tags-Dil

vo ḳhvāb ki dekhā na kabhī le uḌā nīndeñ
vo dard ki uTThā na kabhī khā gayā dil ko

yā saañs kā lenā bhī guzar jaanā hai jī se
yā mārka-e-ishq bhī ik khel thā dil ko

vo aa.eñ to hairān vo jaa.eñ to pareshān
yā-rab koī samjhā.e ye kyā ho gayā dil ko

sone na diyā shorish-e-hastī ne ghaḌī bhar
maiñ laakh tirā zikr sunātā rahā dil ko

rūdād-e-mohabbat na rahī is ke sivā yaad
ik ajnabī aayā thā uḌā le gayā dil ko

juz gard-e-ḳhamoshī nahīñ 'shohrat' yahāñ kuchh bhī
kis manzil-e-ābād meñ pahuñchā liyā dil ko

sa.ī tū apnī na kar ai girya sarf-e-shist-o-shū
dil ke dhone se koī ye daaġh kaale jaate haiñ

dil dukhā maañ kā to phir chain nahīñ pāoge
ghar ko chhoḌā to kahīñ chhat nahīñ milne vaalī

ga.ī yak-ba-yak jo havā palaT nahīñ dil ko mere qarār hai
karūñ us sitam ko maiñ kyā bayāñ mirā ġham se siina figār hai

ye kisī ne zulm bhī hai sunā ki dī phāñsī logoñ ko be-gunāh
vahī kalma-goyoñ kī samt se abhī dil meñ un ke buḳhār hai

ai jazb-e-mohabbat tū hī batā kyūñkar na asar le dil hī to hai
sīdhī bhī chhurī TeḌhī bhī chhurī dil-doz nazar qātil hī to hai

jab huuk uThegī taḌpegā insāf na chhoḌo dil hī to hai
nā-chand thakan kā sabr-o-sukūñ bismil āḳhir bismil hī to hai

tūfān-e-balā kī maujoñ meñ kiiñ band āñkheñ aur phāñd paḌe
kashtī ne jahāñ Takkar khaa.ī dil bol uThā sāhil hī to hai

hai zarf yahāñ kis kā kitnā dil bas hai usī kā paimāna
ronā bhī burā hañsnā bhī burā jo baat hai vo mushkil hī to hai

nā-ḳhush hai to kyā hai ḳhush hai to kyā jaisā bhī sahī hai tū apnā
ye saath nahīñ chhuTne vaalā be-kas kā sahārā dil hī to hai

dukh de ke ulTe denā kyā fariyād natīja hai ġham kā
jab Thes lagī shīsha Thankā patthar na samajhiye dil hī to hai

dil-rubā dil-lagī hai mere saath
is liye āgahī hai mere saath

jalne vaalā hī samajh saktā hai dil kī aag ko
hijr meñ 'ārif' mirā hamdam charāġh-e-shām thā

dil bayābānī saath rakhtā hai
aañkh barsāt chhoḌ jaatī hai

ye āh-e-be-asar kyā ho ye naḳhl-e-be-samar kyā ho
na ho jab dard hī yā-rab to dil kyā ho jigar kyā ho