Tags-Dil

husn-e-dilkash kā bhī kyā andāz hai
naaz goyā hai adā ḳhāmosh hai

vo phuul jo muskurā rahā hai
shāyad mirā dil jalā rahā hai

dil-āzārī mohabbat meñ kahāñ ma.alūm hotī hai
ajab taskīñ pas-e-soz-e-nihāñ ma.alūm hotī hai

ham bhī shā.ir the kabhī jān-e-suḳhan yaad nahīñ
tujh ko bhūle haiñ to dil-dārī-e-fan yaad nahīñ

dil se kal mahv-e-takallum the to ma.alūm huā
koī kākul koī lab koī dahan yaad nahīñ

apnī jānib tire dil ke sabhī ġham khīñchte haiñ
tere apne to baḌhā dete haiñ ham khīñchte haiñ

nuqte pe tere ḳhaal ke bāñdhā hai jin ne dil
vo dā.ere meñ ishq ke sābit-qadam huā

is lutf-zabānī ko zarā sochiye dil meñ
ye uzr to bejā hai ki maiñ kuchh nahīñ kahtā

us lutf-e-zabānī ko zarā sochiye dil meñ
ye uzr to bejā hai ki maiñ kuchh nahīñ kahtā

Dartā nahīñ jo dil meñ ho dushman ke lagā.e
un par ye huvaidā hai ki maiñ kuchh nahīñ kahtā

saare apne hī haiñ terī bazm meñ
ġhair to bas dil kī hālat hai yahāñ

churā.īñ kyuuñ aap ne nigāheñ ki ho ga.iiñ band dil kī rāheñ
maza to jab thā ye tiir aksar idhar se jaate udhar se aate

dekh ke ek baar unheñ dil se to haath dho chuke
dekhiye kyā guzartī hai dūsrī baar dekh kar

aate haiñ vo to pahle hī rañj se saaf ho rahūñ
aa ke kahīñ palaT na jaa.eñ dil meñ ġhubār dekh kar

tum jo chāho na do koī ujrat
dil musalsal karegā mazdūrī

maazī kī chaukhaT pe dastak dil kī hai
yaad us kī ik adā-e-pā lage

jo tujh se ḳhush-jamāl hai aur dil-fareb bhī
duniyā tire shabāb ke aage kuchh aur hai

hai dil-e-nākām-e-āshiq meñ tumhārī yaad bhī
ye bhī kyā ghar hai ki hai barbād bhī ābād bhī

dil ke miTne kā mujhe kuchh aur aisā ġham nahīñ
haañ magar itnā ki hai is meñ tumhārī yaad bhī

dil diyā vahshat liyā aur ḳhud ko rusvā kar liyā
muḳhtasar sī zindagī meñ maiñ ne kyā kyā kar liyā