abas hai nāz-e-istiġhnā pe kal kī kyā ḳhabar kyā ho
ḳhudā ma.alūm ye sāmān kyā ho jaa.e sar kyā ho
ye āh-e-be-asar kyā ho ye naḳhl-e-be-samar kyā ho
na ho jab dard hī yā-rab to dil kyā ho jigar kyā ho
jahāñ insān kho jaatā ho ḳhud phir us kī mahfil meñ
rasā.ī kis tarah ho daḳhl kyūñkar ho guzar kyā ho
na pūchhūñgā maiñ ye bhī jaam meñ hai zahr yā amrit
tumhāre haath se andesha-e-naf-o-zarar kyā ho
muravvat se ho begāna vafā se duur ho kosoñ
ye sach hai nāznīñ ho ḳhūbsūrat ho magar kyā ho
shagūfe dekh kar muTThī meñ zar ko muskurāte haiñ
ki jab umr is qadar kotāh rakhte haiñ to zar kyā ho
rahā kartī hai ye hairat mujhe zuhd-e-riyā.ī par
ḳhudā se jo nahīñ Dartā use bande kā Dar kyā ho
kahā maiñ ne ki 'nazm'-e-mubtalā martā hai hasrat meñ
kahā us ne agar mar jaa.e to merā zarar kyā ho
kahā maiñ ne ki hai soz-e-jigar aur uff nahīñ kartā
kahā is kī ijāzat hī nahīñ phir nauhagar kyā ho
kahā maiñ ne ki de us ko ijāzat aah karne kī
kahā us ne bhaḌak uTThe agar soz-e-jigar kyā ho
kahā maiñ ne ki aañsū aañkh kā lekin nahīñ thamtā
kahā āñkheñ koī talvoñ se mal Daale agar kyā ho
kahā maiñ ne qadam bhar par hai vo sūrat dikhā aao
kahā muñh pher kar itnā kisī ko dard-e-sar kyā ho
kahā maiñ ne asar mutlaq nahīñ kyā sañg-dil hai tū
kahā jab dil ho patthar kā to patthar par asar kyā ho
kahā maiñ ne jo mar jaa.e to kyā ho soch tū dil meñ
kahā nā-āqibat-andesh ne kuchh soch kar kyā ho
kahā maiñ ne ḳhabar bhī hai ki dī jaañ us ne ghuT ghaT kar
kahā mar jaa.e chupke se to phir mujh ko ḳhabar kyā ho