Tags-Dil

chhupāyā rāz-e-mohabbat ko dil meñ par haihāt
kare hai naam mirā bad ye chashm-e-nam gustāḳh

jabīñ-e-navāz kisī kī fusūñ-garī kyuuñ hai
sarisht-e-husn meñ is darja dilkashī kyuuñ hai

tire shi.ār-e-taġhāful pe zindagī qurbāñ
tire shi.ār-e-taġhāful meñ dilkashī kyuuñ hai

ye kab kahā hai ki tum vaj.h-e-shorish-e-dil ho
ye pūchhtā huuñ ki dil meñ ye bekalī kyuuñ hai

ishq meñ zehn ko taklīf na dī dil kī sunī
ham usī vāste anjām nahīñ jānte haiñ

beshtar log jise umr-e-ravāñ kahte haiñ
vo to ik shaam hai aur kūcha-e-dildār meñ hai

dil kahāñ apnī riyāsat se alag jaatā hai
vo to ab bhī usī ujḌe hue darbār meñ hai

tumheñ jo mere ġham-e-dil se āgahī ho jaa.e
jigar meñ phuul khileñ aañkh shabnamī ho jaa.e

yahī hai dil kī halākat yahī hai ishq kī maut
nigāh-e-dost pe iz.hār-e-bekasī ho jaa.e

siyāh-ḳhāna-e-dil meñ hai zulmatoñ kā hujūm
charāġh-e-shauq jalāo ki raushnī ho jaa.e

kyuuñ bahār aatī nahīñ dil ke ḳharābe kī taraf
kyā tirī shādāb zulfoñ kī havā taaza nahīñ

phir vo andāz-e-nazar yaad aayā
chāk-e-dil tā-ba jigar yaad aayā

haa.e vo mārka-e-nāvak-e-nāz
dil bachāyā to jigar yaad aayā

dard ko phir hai mire dil kī talāsh
ḳhāna-barbād ko ghar yaad aayā

baḌhī hai aapas meñ bad-gumānī maza mohabbat kā aa rahā hai
ham us ke dil ko TaTolte haiñ to ham ko vo aazmā rahā hai

ghar apnā kartī hai nā-umīdī hamāre dil meñ ġhazab hai dekhiyo
ye vo makāñ hai ki jis meñ barsoñ umīdoñ kā jamghaTā rahā hai

badal gayā hai mizāj un kā maiñ apne is jazb-e-dil ke sadqe
vahī shikāyat hai ab udhar se idhar jo pahle gila rahā hai

kisī kī jab aas TuuT jaa.e to ḳhaak vo aasrā lagā.e
shikasta dil kar ke mujh ko zālim nigāh ab kyā milā rahā hai

yahāñ to tark-e-sharāb se ḳhud dil-o-jigar phuñk rahe haiñ vaa.iz
sunā ke dozaḳh kā zikr-e-nāhaq jale ko tū bhī jalā rahā hai

qasr vīrān huā jaatā hai
dil pareshān huā jaatā hai