Tags-Dil

bose kā talazzuz ho kabhī tauf kī rāhat
armān mirā ye dil-e-kāfir bhī nikāle

dil ġhanī hai mirā to kyā parvā
kab milātā huuñ māl-dār se aañkh

guzarte lamhoñ ke dil meñ kyā hai hameñ pata hai
havā ke āñchal pe kyā likhā hai hameñ pata hai

lutf ho gar tū ho aur mai-ḳhāna ho
maiñ huuñ aur merā dil-e-dīvāna ho

aaj is qarya-e-vīrāñ meñ ye aahaT kaisī
dil ke andar hai koī aur na bāhar koī

dil kī dhaḌkan ulajh rahī hai ye kaisī sauġhāt ġhazal kī
tār-e-nafas par uñglī rakh dī chheḌ ke tum ne baat ġhazal kī

saf.ha-e-dil par misra-e-tar kī shakl meñ aañsū girte haiñ
dard ke bādal chhāte haiñ to hotī hai barsāt ġhazal kī

kyā muskurā ke Taale hai ab phir kab aa.egā
dil be-qarār hotā hai kuchh to qarār kar

dāġhoñ se dil ke siina to hai rashk-e-lāla-zār
haañ ashk-e-surḳh tū bhī to apnī bahār kar

vo bhī na aayā aur nazar aane se rah gayā
dekhā mazā na aur dil ab intizār kar

ye dil kī pyaas ye duniyā ke fāsle 'bāqī'
bahut qarīb se ab to koī sadā aa.e

āñkhoñ meñ chand ḳhvāb the aur dil meñ kuchh umiid
jaltā rahā maiñ aag kī mānind umr bhar

zaḳhm to bahut aa.e phir bhī hausla rakkhā
umr-bhar mohabbat meñ ham ne dil baḌā rakkhā

dil ġham-e-zamāna kī dastaras meñ kyā aatā
pattharoñ kī zad par ḳhud ham ne aa.ina rakkhā

kab tak 'shakīl' dil ko duā kījiyegā aap
behtar yahī hai un ko bhulā dījiyegā aap

dil ke evaz to ġham hī diyā aap ne magar
ab jaañ bhī nazr kar duuñ to kyā kījiyegā aap

ehsās-e-tark-e-shauq bajā hai magar 'shakīl'
māñgā javāb dil ne to kyā dījiyegā aap

gosha-e-dil kī ḳhamoshī kā tamannā.ī maiñ
aur hañgāme uThā laayā hai bāzār se tū

laus-e-talab ke nañg se ishq ko be-niyāz rakh
ho bhī jo koī aarzū dil se miTā ke bhuul jā

kahīñ ummīd sī hai dil ke nihāñ ḳhāne meñ
abhī kuchh vaqt lagegā use samjhāne meñ