Tags-Dil

saḳht yāroñ kī kudūrat se huā huuñ be-dil
khā ga.e ā.īna-e-dil mirā zañgār ka.ī

din paḌe shola-ruḳhoñ bin mujhe juuñ dūd-e-charāġh
merī dil-sozī se jalte haiñ shab-e-tār ka.ī

daur-e-hāzir meñ mohabbat kā koī mol nahīñ
dil bhī hone lage nīlām zamīnoñ kī tarah

maiñ ne duniyā kī nigāhoñ se bachā kar ai 'kalīm'
dil meñ rakkhā tirī yādoñ ko dafīnoñ kī tarah

na shauq-e-rahzanī-e-dil na zauq-e-ġhārat-e-jāñ
ajab tarīq mire kārvāñ se pahle thā

hunūz dil meñ usī shadd-o-mad se hai 'bismil'
vo hausla jo mujhe imtihāñ se pahle thā

vo uTThe dard uTThā hashr uTThā
magar dil hai ki baiThā jā rahā hai

'jalīl' ab dil ko apnā dil na samjho
koī kar ke ishārā jā rahā hai

dekhā azāb-e-ranj dil-e-zār ke liye
āshiq hue haiñ vo mire āzār ke liye

dil ishq tere nazr kiyā jaan kyūñki duuñ
rakkhā hai us ko hasrat-e-dīdār ke liye

aatā nahīñ hai tū to nishānī hī bhej de
taskīn-e-iztirāb-e-dil-e-zār ke liye

kyā dil diyā thā is liye maiñ ne tumheñ ki tum
ho jaao yuuñ udū mire aġhyār ke liye

sabaq hai sīkhā ham ahl-e-dil ne ye ijz kī sar-bulandiyoñ se
ki ek sajda hai kaafī lekin ho bandagī bandagī kī sūrat

barahna-sar ābla-gazīda shikasta-dil pairahan-darīda
maqām-e-sidra pe soch meñ huuñ koī hai parda-darī kī sūrat

nākāmi-e-ārzū ko dil ne
taslīm o razā ke naam baḳhshe

nigāh-e-yār mil jaatī to ham shāgird ho jaate
zarā ye siikh lete dil ke le lene kā Dhab kyā hai

ye rañg dard ke aate nahīñ suḳhan meñ yūñhī
nihāl-e-dil pe mire zaḳhm hai khulā koī

nā-rasā.ī kā rañj laa.e haiñ
tere dil meñ kahīñ samone ko