Tags-Dil

ajiib ḳhauf kī bastī hai ye diyā hī nahīñ
havā bhī ḳhvāhish-e-dil ko chhipā.e phirtī hai

nazar na pher nadāmat ko sair hone de
ye badlī dil meñ kahāñ roz roz ghirtī hai

vo ghar vaalī sundar chaterā ghar kī sevā karne vaalī dil kā dilāsā ghar apnā
ārām hameñ dene vaalī aap musībat bharne vaalī jaan se pyārā ghar apnā

vo paak havā apne ghar kī pyaar kī jilā apne ghar kī dil meñ samāyā ghar apnā
īsār-e-vafā apne ghar kā vo dard diyā apne ghar kī ruuh pe chhāyā ghar apnā

shab-e-'firāq' uThe dil meñ aur bhī kuchh dard
kahūñ ye kaise tirī yaad rāt-bhar aa.ī

tū jism hai to mujh se lipaT kar kalām kar
ḳhushbū hai gar to dil meñ simaT kar kalām kar

bah jaave lahū ho ke dil-e-qāfila-sālār
ta.alīm de naala jo mirā bāñg-e-jaras ko

phirtā hai udhar zulf meñ shāna to idhar dil
ye duzd na laayā kabhū ḳhātir meñ asas ko

rū-ba-rū haiñ vo dekhtā kyā hai
hāl-e-dil kah de sochtā kyā hai

hai vafā dil meñ yā jafā kyā hai
saaf kahiye ki mājrā kyā hai

aabrū dard-e-dil kī baḌh jaa.e
jab vo pūchheñ tumheñ huā kyā hai

dil meñ utregī to pūchhegī junūñ kitnā hai
nok-e-ḳhanjar hī batā.egī ki ḳhuuñ kitnā hai

sabr aur dīn-o-dil to tum aage hī le chuke
baaqī hai jaañ hamārī so ab ye bhī lījiye

deve vo jaam ġhair kuuñ yuuñ mere sāmne
ye dekh kyūñki ḳhūn-e-dil apnā na pīji.e

ye ziist tarf-e-dil hī meñ yā-rab tamām ho
kāfir huuñ gar irāda-e-bait-ul-harām ho

dil kī har baat tirī mujh ko batā detī hai
terī ḳhāmosh nazar mujh ko sadā detī hai

ye jān-e-āshiqī hai is ko kis dil se judā kar duuñ
na jaane kitne ġham sah kar to mujh tak bekasī aa.ī

kisī sūrat meñ ho ye dil kī nisbat chhup nahīñ saktī
mire rone pe āḳhir ik tumhīñ ko kyoñ hañsī aa.ī

ek muddat se duur hai lekin
phir bhī is dil ke paas hai ik shaḳhs