Tags-Dil

ye dil tārīk hujra hai ise raushan karo aa kar
ye din tārīkiyoñ vaale jo kaT jaate to achchhā thā

maqām-e-dil kahīñ ābādiyoñ se duur hai shāyad
magar ye fāsle dal ke simaT jaate to achchhā thā

dil dhaḌaktā hai mabādā uTh ke deve gāliyāñ
yaar sotā hai mirā us ko jagā.ūñ kis tarah

dil dabā jaatā hai kitnā aaj ġham ke baar se
kaisī tanhā.ī Tapaktī hai dar o dīvār se

nau-giraftār-e-mohabbat huuñ vafā mujh meñ kahāñ
kam se kam dil abhī sau baar to aane diije

terā sailāb sañg-dil hai bahut
is ghamanDī ke par katar dariyā

vo rāh-e-ishq meñ dil kī ma.āl-andeshī
vo merī aql kī nādāniyāñ ma.āz-allāh

vo paas aa.e to dil be-qarār hone lagā
sukūn-e-dil kā mire intishār hone lagā

phir āsmān-e-muqaddar pe koī halchal hai
ki nā-gahāñ mire dil pe ġhubār hone lagā

khaḌe haiñ dil meñ jo barg-o-samar lagā.e hue
tumhāre haath ke haiñ ye shajar lagā.e hue

ye tanhā.ī ye sannāTā dil ko magar samjhā.e kaun
itnī bhayānak raat meñ āḳhir milne vaalā aa.e kaun

huī pairahan se bhī ḳhush-dilī kalī dil kī aur bahut khilī
kabhī turre se kabhī gajre se kabhī baddhī se kabhī haar se

jaras aur sārbānoñ tak pahuñchnā chāhtā hai
ye dil agle zamānoñ tak pahuñchnā chāhtā hai

ik sāñvle badan se mohabbat qubūl kar
ai rabb-e-ishq dil kī shahādat qubūl kar

dil ne abhī bichā.ī hai jā-e-namāz-e-ishq
luknat-zada zabāñ kī iqāmat qubūl kar

salīqa kyā kare is meñ koī betābi-e-jāñ ko
chhupāo sau tarah jab dil ho be-qābū nahīñ chhuptī

betāb huuñ kyā chiiz churā lī hai nazar ne
hone ko to dil bhī hai mire paas jigar bhī

haTtī hai jo ā.īna se paḌ jaatī hai dil par
kyā shoḳh nazar hai ki udhar bhī hai idhar bhī

ai dil tirī aaheñ to sunīñ kānoñ se ham ne
ab ye tū batā us pe kareñgī ye asar bhī