jin ḳhvāboñ se niind uḌ jaa.e aise ḳhvāb sajā.e kaun
ik pal jhūTī taskīñ pā kar saarī raat gañvā.e kaun
ye tanhā.ī ye sannāTā dil ko magar samjhā.e kaun
itnī bhayānak raat meñ āḳhir milne vaalā aa.e kaun
sunte haiñ ki in rāhoñ meñ majnūñ aur farhād luTe
lekin ab aadhe raste se lauT ke vāpas jaa.e kaun
sunte samajhte hoñ to un se koī apnī baat kahe
gūñgoñ aur bahroñ ke aage Dhol bajāne jaa.e kaun
us mahfil meñ log haiñ jitne sab ko apnā ronā hai
'tābish' maiñ ḳhāmosh-tabī.at merā haal sunā.e kaun