Tags-Dil

ham ye samjheñge ki dil thā hī nahīñ siine meñ
un kī duzdīda nigāhoñ kā asar ho to sahī

ghar meñ laa.ī to hai betābī-e-dil dekh zarā
kahīñ pahchān na leñ ye dar-o-dīvār mujhe

yūrish-e-ālām hai lekin mirā dil ek hai
saiñkaḌoñ maujoñ kī zad meñ aaj sāhil ek hai

zarā dekheñ to kyuuñ kar dam nikal jaatā hai sadmoñ se
firāq-e-dil-rubā aaj imtihāñ karte haiñ ham tere

chhuptā nahīñ hai dil meñ kabhī raaz ishq kā
ye aag vo hai jis ko nahīñ taab sañg meñ

gunah se serī huī nahīñ hai ye kahte haiñ sab ajal qarīñ hai
qalaq meñ har dam dil-e-hazīñ hai ki hogā apnā ma.aal kaisā

ġhazab se hai vaañ jo chiiñ jabīñ par hujūm-e-ġham hai dil-e-hazīñ par
lahū ke dhabbe haiñ āstīñ par hai dāman ashkoñ se laal kaisā

guzrī hai yuuñ to dasht meñ tanhā.iyoñ ke umr
dil be-niyāz-e-kūcha-o-bāzār bhī nahīñ

ruk ruk ke chal rahe haiñ ki manzil nahīñ koī
har kūcha varna kūcha-e-dildār bhī nahīñ

kahtā huuñ soz-e-dil se ki kar chuk jalā ke ḳhaak
ek baat par jo yaar ne jaanī uThā ke ḳhaak

dil ātish-e-hijrāñ se jalānā nahīñ achchhā
ai sho.ala-ruḳho aag lagānā nahīñ achchhā

aa jaa.e na dil aap kā bhī aur kisī par
dekho mirī jaañ aañkh laḌānā nahīñ achchhā

ham to hoñ dil se duur raheñ paas aur log
sūñgheñ gul-e-ezār kī bū-bās aur log

ai nāla-e-dil-doz taḌap uTThī ḳhamoshī
hai marg-e-tamāshā kisī ābād nagar meñ

ab ham visāl-e-yār se be-zār haiñ bahut
dil kā jhukāv hijr kī jānib balā kā hai

zahe qismat agar tum ko hamārā dil pasand aayā
magar ye daaġh kyuuñ kar ai mah-e-kāmil pasand aayā

yuuñ bhī hotā hai ki yak dam koī achchhā lag jaa.e
baat kuchh bhī na ho aur dil meñ tamāshā lag jaa.e

abhī dīvār uThā.ī bhī na ho dil kī taraf
lekin is meñ koī dar koī darīcha lag jaa.e

maiñ ne aur dil ne isī baab meñ sochā hai ki ham
kaam kuchh bhī na kareñ koī vazīfa lag jaa.e

ye bhī mumkin hai ki is kār-gah-e-dil meñ 'zafar'
kaam koī kare aur naam kisī kā lag jaa.e