Tags-Dil

nukta-chīnī hasad dil-āzārī
aur kyā hai matā-e-be-hunarāñ

mujh ko us ko talāsh hai 'rif.at'
jo mire dil meñ hai kahīñ pinhāñ

fasāna-e-sitam-e-kā.enāt kahte haiñ
ye ashk-e-ġham to mire dil kī baat kahte haiñ

agarbattī ke jaisā ho gayā hai dil hamārā ab
vo apne devtā ke sāmne jal kar mahaktā hai

ishq ne is dil ko dam lene kī fursat hī na dī
ek jab armān niklā dūsrā paidā huā

ab 'falak' hai ik na.ī duniyā kī dil kī justujū
ye zamīñ dekhī huī hai āsmāñ dekhā huā

kāfūr hai dil-jaloñ ko tanvīr-e-sahar
ThanDak hai kalejoñ kī tabāshīr-e-sahar

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

sar paTaḳhtī haiñ ḳhvāhisheñ dil meñ
varna fariyād kaun kartā hai

kyā qayāmat hai dil mire tham jā
itnī uftād kaun kartā hai

huā kareñ tire kaan āshnā-e-shor-e-jaras
safar kā dil meñ irāda nahīñ to kuchh bhī nahīñ

hamāre butkada-e-dil meñ DhūñD to zāhid
yahīñ kahīñ tirā kaaba nahīñ to kuchh bhī nahīñ

dil bhī ik zid pe aḌā hai kisī bachche kī tarah
yā to sab kuchh hī ise chāhiye yā kuchh bhī nahīñ

jab dahakte hue hoñToñ kā tasavvur ubhre
dil meñ soyā huā har zaḳhm harā hotā hai

mile jo nūr-talab dil bhī yuuñ munavvar ho
mirā harīf bhī shām-o-sahar burā na lage

kabhī na baat zamāne ne dil lagā ke sunī
yahī to ḳhaas sabab merī be-dilī kā hai

kise ḳhabar thī ki zehn-o-dil meñ ajiib sā intishār hogā
vo vaqt aa.egā be-yaqīnī kā chār-jānib ġhubār hogā

chale to ho 'arsh' rāh-e-haq par liye hue dil meñ azm lekin
jahāñ jahāñ bhī qadam paḌeñge vahīñ vahīñ ḳhārzār hogā