Tags-Dil

tū arab ho yā ajam ho tirā lā ilaah illā
luġhat-e-ġharīb jab tak tirā dil na de gavāhī

dil-e-be-tāb ko kab vasl kā yaarā hotā
shādī-e-daulat-e-dīdār ne maarā hotā

kyuuñ na siine se lagī rahtī amānat terī
dāġh-e-dil kyuuñ na hameñ jaan se pyārā hotā

duur se sāġhar-o-mīnā ko khaḌā taktā huuñ
dil koī rakhtā to mujh ko bhī pukārā hotā

chāragarī batā.e agar kuchh ilaaj hai
dil TūTne lage haiñ sadā ke baġhair bhī

shaam kī āḳhirī aahaT pe dahaltā huā dil
sub.h kī pahlī havāoñ meñ bhigoyā huā maiñ

dil ke khañDarāt ham ko kaafī haiñ
rājdhānī kā kyā kareñ sāhab

dil hai zinda magar dhaḌaktā nahīñ
āñ-jahānī kā kyā kareñ sāhab

hai intizār muqaddar to intizār karo
par apne dil kī fazā ko bhī ḳhush-gavār karo

vo kisī aur tasalsul meñ rahā mahv-e-kalām
merī bātoñ kā bhalā dil pe asar kyā letā

tirā jamāl fasānoñ meñ rañg bhartā hai
tire shabāb se dilkash mirī kahānī hai

dil-e-fasurda meñ hotī hai zindagī paidā
'nushūr' jura-e-sahbā bhī zindagānī hai

sub.h hote bujh ga.e saare charāġh
dāġh-e-dil tā shaam jaltā hī rahā

kab thamā āñkhoñ se merī ḳhūn-e-dil
josh khā khā kar ubaltā hī rahā

kyā huā marham lagāne se 'fuġhāñ'
zaḳhm-e-dil siine meñ saltā hī rahā

vahāñ dil meñ mohabbat kī kamī hai
jahāñ shikve zabāñ tak aa ga.e haiñ

na pahuñche ḳhāna-e-dil ke makīñ tak
zamīñ se āsmāñ tak aa ga.e haiñ

yā dil se tark kījiyo dastār kā ḳhayāl
yā us muāmle meñ kabhī sar na dījiyo

paḌī jis taraf ko nigāh yaañ nazar aa gayā hai ḳhudā hī vaañ
ye haiñ go ki āñkhoñ kī putliyāñ mire dil meñ jaa.e butāñ nahīñ

mire dil ke shīshe ko bevafā tū ne TukḌe TukḌe hī kar diyā
mire paas to vahī ek thā yaañ dukān-e-shīsha-garāñ nahīñ