Tags-Dil

bhaḌās dil kī nikālī ga.ī kuchh aise bhī
duā.eñ māñgī ga.iiñ chīḳhte chillāte hue

terī yādeñ ho ga.iiñ jaise muqaddas āyateñ
chain aatā hī nahīñ dil ko tilāvat ke baġhair

jo baat dil meñ thī us se nahīñ kahī ham ne
vafā ke naam se vo bhī fareb khā jaatā

āzār-e-dil se rañg-e-tabī.at badal gayā
āḳhir dimāġh fikr-e-musalsal se chal gayā

uThtā hai dard pahlū meñ goyā nahīñ hai dil
jaadū kisī kī shoḳh nigāhoñ kā chal gayā

haiñ bul-havas hazāroñ koī ahl-e-dil nahīñ
ab rasm-e-āshiqī se bhī husn-e-amal gayā

daa.im shab-e-firāq meñ sho.ale se ishq ke
misl-e-charāġh dāġh-e-dil-e-ḳhasta jal gayā

āshuftagī se mere dil-e-nā-tavāñ kā haal
bigḌā ḳhudāyā aisā mirā dam nikal gayā

kabhī āñkhoñ pe kabhī sar pe biThā.e rakhnā
zindagī talḳh sahī dil se lagā.e rakhnā

chāñd kyā chiiz hai sūraj bhī ubhar aa.egā
zulmat-e-shab meñ lahū dil kā jalā.e rakhnā

ḳhayāl-e-yār meñ ho mahv-e-be-ḳhudī aisā
mujhe ḳhabar nahīñ dil kyā hai aur jigar kyā hai

kahe hai ishq meñ nāseh ki hai zarar dil kā
jo vāqa.ī hai zarar ye hai to zarar kyā hai

hai dil ko naaz tire jis jahān-e-fānī par
batā vo aur ba-juz ḳhāna-e-do-dar kyā hai

tū kis ghamanD pe misl-e-sharar uchhaltā hai
ḳhayāl dil meñ to kar hastī-e-sharar kyā hai

ba-nām-e-daulat-e-husn-o-jamāl be-pāyāñ
samajh ke kījiye ahl-e-talab kī dil-shikanī

majāl-e-āh na thī dil ko bazm-e-jānāñ meñ
ye ehtiyāt bhī thī muqtazā-e-gul-badanī

ِduzdī-e-dil kā yaqīñ ho kis tarah
kis ne ai duzd-e-hinā dekhā tujhe

usī ko yaad dilātā hai baar baar dimāġh
vo ek baat jo dil meñ anī sī lagtī hai

tere ḳhayāloñ ke parde se jab ġham-e-duniyā jhāñk uThā
ruk ga.ī jaise vaqt kī gardish ho ga.ī dil par bhārī raat

aap na māneñ aap na samjheñ aap pe dil kā zor nahīñ
ham ne apnā dard kahā hai aap se saarī saarī raat