Tags-Dil

har dhaḌkan se pyaar kā amrit har ik lafz meñ utrā thā
saarī umr jo likkhā dil ne vahī vazīfa bhuul gayā

kyā tujhe mismārī-e-dil kī ḳhabar koī na thī
kis liye bhejīñ na tū ne phir abābīleñ vahāñ

fitna-ḳhū le ga.ī dil chhīn ke jhaT-paT ham se
aur phir sāmne aane meñ hai ghuñghaT ham se

bane haiñ jab se vo lailā na.ī mahmil meñ rahte haiñ
jise dīvāna karte haiñ usī ke dil meñ rahte haiñ

dil hai ki ik ajnabī-e-hairāñ tum ho ki parāyā des
nazroñ kī kahānī ban na sakīñ hoñToñ pe ruke paiġhām

aarzū ḳhvāb dil-lagī va.ada
in gharoñdoñ pe kuchh bharosā kyā

detā nahīñ hai chain ilāhī maiñ kyā karūñ
phirtā huuñ rāt-din dil-e-betāb kū liye

ham dil pe sahe jaate haiñ har tīr-e-jafā ko
hai kis kā jigar dekhe jo ham dekh rahe haiñ

dil dukhātā hai vo mil kar bhī magar aaj kī raat
isī be-dard ko le aao ki kuchh raat kaTe

dil bād-e-fanā bhī hai girāñ-bār-e-amānat
duniyā se subuk-dosh uThā bhī nahīñ jaatā

vo tarab-zār dil-e-qasr-e-ġham
rāt-bhar jāgtī āgahī ya.anī

ye ḳhad-o-ḳhāl ye ḳhvāboñ se tarāshā huā jism
aur dil jis pe ḳhad-o-ḳhāl kī narmī bhī nisār

haiñ sabhī husn-parast ahl-e-nazar sāhib-e-dil
koī ghar meñ koī mahfil meñ sajā.egā tujhe

savāl mab.hūt se khaḌe haiñ ki jaise sīnoñ meñ dil nahīñ haiñ
ufuq ke us paar jā ke dekho shikasta muztar javāb raushan

jin pyaar ke lamhoñ se dil shaad sā rahtā thā
'dilshād' vahī lamhe ranjūr sā karte haiñ

kyā kyā kiyā hai kūcha-ba-kūcha mujhe ḳharāb
ḳhāna ḳharāb ho dil-e-ḳhāna-ḳharāb kā

dīda-e-tar se jo dāman meñ girā dil Thahrā
bahte bahte ye safīna lab-e-sāhil Thahrā

kī nazar rū-e-kitābī pe to kuchh dil Thahrā
maktab-e-shauq bhī qur.ān kī manzil Thahrā