Tags-Dil

dil Duub jā.egā mirā bārish meñ pyaar kī
sailāb-e-ishq aane kī shāyad shunīd hai

har vaqt mere lab pe rahī hai yahī duā
mil jaa.e vo ki jis kā mirā dil murīd hai

phir tirā zikr kiyā bād-e-sabā ne mujh se
phir mire dil ko dhaḌakne ke bahāne aa.e

dil meñ chāhat hai 'ġhazal' sirf tujhe paane kī
koī to vasl kī anmol ghaḌī sābit ho

ham hijr meñ ye kahte rahe dil se baar baar
vo hai faqat zarā sā ḳhafā mutma.in raho

jis dam mirī imārat-e-dil sho.ala-posh thī
maiñ ne sunā ki vo bhī tamāshā.iyoñ meñ thā

uTThā usī se ziist ke ehsās kā ḳhamīr
jo dard-e-dil ke zaḳhm kī pahnā.iyoñ meñ thā

nigah-e-yās se kise dekhūñ
dil-e-dard-āshnā nahīñ miltā

jis ko 'jāved' us ne khoyā hai
usī dil kā patā nahīñ miltā

pahāḌ gūñjeñ nadī gaa.e ye zarūrī hai
safar kahīñ kā ho dil meñ kisī kā pyaar bhī rakh

pahle mujh ko bhī ḳhayāl-e-yār kā dhokā huā
dil magar kuchh aur hī aalam meñ thā khoyā huā

dil kī sūrat ghaT rahī hai Dūbte sūraj kī lau
uTh rahā hai kuchh dhuāñ sā duur bal khātā havā

dil se Takrā jaatī hai rah rah ke koī mauj 'zeb'
shab kā sannāTā koī bahtā huā dariyā huā

samajh le ye dil meñ 'āsmāñ' tū vo loT haiñ tere loTne par
jo oḌh kar laTpaTā dupaTTa luTāte haiñ adbadā ke āñchal

usī ke faiz se nā-mehrbāñ huā hai dil
makāñ mizāj hamesha makīñ kā rakhte haiñ

dar-e-dil par abhī dastak na denā
añdherā hai ujāle so rahe haiñ

faroġh-e-dīda-o-dil lāla-e-sahar kī tarah
ujālā ban ke raho sham-e-rahguzar kī tarah

kal jo maiñ ne jhāñk ke dekhā us kī niilī āñkhoñ meñ
us ke dil kā zaḳhm to 'mājid' sāgar se bhī gahrā hai

na jaane kaun sā aaseb dil meñ bastā hai
ki jo bhī Thahrā vo āḳhir makān chhoḌ gayā

uḌte hue aate haiñ abhī sañg-e-tamannā
aur kār-gah-e-dil kī vahī shīshagarī hai